FOTO/Aksidentohet në Maqedoni
ish- ministri, Arben AhmetajPërplaset me autobusin,përmbyset “Range Rover”
Nga aksidenti 14 të plagosur, 2 me dëmtime të mëdha

Kryeministri, Edi Rama, sot në një status në Facebook, teksa mohoi akuzat e mediave greke se ka kaluar pushime në vendin fqinj u kërkoi ministrave të tij e për pasojë edhe zyrtarëve të tjerë që pushimet ti kalonin në Shqipëri.

Por teksa kryeministri vendosi këtë rregull ish Ministri i Financave, aktualisht deputet i PS, Arben Ahmetaj, i kishte nisur pushimet jashtë vendit, ku mesa duket ka zgjedhur Maqedoninë.

Por sot Ahmetaj u përfshi në një aksident rrugor në Kumanovë e për pasojë ai së bashku me personat që shoqëronin kanë përfunduar në spitalin e Kumanovës. Ndërkohë siç shihet në këtë foto, automjeti i Ahmetaj- t është përplasur me një autobus. 

Në spital Arben Ahmetajn e ka vizituar zv Ministri i Brëndshëm i Maqedonisë Agim Nuhiu, i cili publikoi dhe një foto në Facebook.

Zv Ministri i Punëve të Brendshme të Maqedonisë, Agim Nuhiu, i kontaktuar nga Report TV për këtë ngjarje u shpreh se gjendja e Ahmetajt është e mirë.

Nuhiu konfirmoi se aksidenti ka ndodhur pranë Kumanovës dhe se Arben Ahmetaj nuk ka qenë vetëm në makinë.

Nuhiu shtoi se është aksident me pasoja të lehta dhe se Ahmetaj ka marrë ndihmë mjekësore në spitalin e Kumanovës.

Nga aksidenti, i cili ndodhi rreth orës 18:00, janë lënduar të paktën 14 persona.

"Nga 14 personat e lënduar, dhjetë janë nga autobusi dhe katër ne mjetin me te cilin po udhetonte Ahmetaj. Dy prej tyre për shkak të dëmtimeve te mëdha janë dërguar në Spitalin e Shkupit, ndërsa dy janë mbajtur në mjekim të mëtejshëm në pavjonin e kirurgjisë në Kumanovë dhe janë jashtë rrezikut të jetës", deklaroi drejtori i spitalit të Kumanovës, Arif Latifi.

Dhjetë të lënduarit e tjerë, udhëtarë nga autobusi, pas ndihmës së dhënë janë dërguar në mjekim shtëpiak. 

Aksidenti ka ardhur si pasojë e lagështisë së rrugës për shkak të reshjeve të shiut të rëna në zonën ku ndodhi ngjarja ditën e djeshme. Por pritet fjala e ekspertëve për të përcaktuar shkaqet e sakta të këtij aksidenti që për pak sa nuk rezultoi fatal.






(Range Rover i ish-ministrit Ahmetaj dhe autobusi me të cilin u përplas në Maqedoni)




(Statusi i bërë nga Agim Nuhiu)

Redaksia Online
D.T/E.B/Shqiptarja.com