FOTO/Kush është kryesuesja
e vëzhguesve të OSBE-ODIHR?

Misioni ndërkombëtar i vëzhgimit të zgjedhjeve përbëhet nga 330 vëzhgues nga 43 vende, duke përfshirë 255 vëzhgues afatgjatë dhe afatshkurtër të vendosur nga OSBE/ODIHR-i, 36 parlamentarë dhe punonjës nga Asambleja e OSBE-së, 25 nga APKE dhe 11 nga PE-ja.

Marietta Tidei është vendosur në krye të delegacionit të Asamblesë Parlamentare të OSBE-së. Tidei është deputete e Partisë Demokratike në Itali. Kjo nuk është hera e parë që ajo merr pjesë në misione ndërkombëtare për monitorim zgjedhjesh pasi është njëkohësisht edhe anëtare e Presidencës së Asamblesë Parlamentare të OSBE-së.



(Marietta Tidei, kryesuese e misionit të vëzhguesve në Shqipëri)

Marietta Tidei ka lindur në vitin 1975. Ajo është vajza e një ish deputeti dhe është shkolluar në shkenca administrimi. Në zgjedhjet e 2013 është zgjedhur deputete në Lacio. Ajo bën pjesë në komisionit e Punëve të Jashtme e Komunitare dhe në Komisionin e Veprimtarive Prodhuese, Tregtisë e Turizmit.

Më herët ka mbajtur detyrën e zëvendës-shefes së kabinetit të Presidentit të Këshillit Rajonal të Lacios, ka qenë këshilltare komunale në Civitavecchia e dhe zëvëndës sekretare e Partisë Demokratike në Romë.

“Trcgiornale.it”, një media lokale në Civitavecchia (vendlindja e Tideit), citon deputeten italiane që shprehet se vota e së dielës ka një rëndësi strategjike për Shqipërinë dhe rajonin në terësi. “Shqipëria po bëhet gati për një hap të rëndësishëm, atë të negociatave për anëtarësim në Bashkimin Europian dhe në vitet e fundit ka shënuar hapa të rëndësishëm në reformimin e administratës publike, sistemit gjyqësor e luftës kundër korrupsionit e krimit të organizuar”, shprehet Tidei.

Kjo nuk është hera e parë që misioni monitorues i OSBE-së për Shqipërinë drejtohet nga një grua. Dy procese të mëparshme zgjedhore janë monitoruar nga ekipi i vëzhguesve të drejtuar nga Audrey Glover.

Ndërkohë, në rrjetet sociale, Tidei ka postuar edhe foto nga takimet e zhvilluara në Tiranë me ekipin monitorues të zgjedhjeve e me përfaqësues të subjekteve politike. 

(Foto e vëzhguesve e postuar nga Tidei)

Vetëm një ditë pas mbajtjes së zgjedhjeve parlamentare në Shqipëri, vëzhguesit ndërkombëtare dhe OSBE/ODIHR që monitorojnë procesin zgjedhor do të dalin në një konferencë për shtyp ditë e hënë në datën 26 qershor.

Deklarata do të paraqitet nga Roberto Battelli, Koordinator i Posaçëm dhe udhëheqës i misionit të vëzhguesëve afatshkurtër të OSBE-së

Redaksia Online
l.q/Shqiptarja.com

TAG:
• OSBE
• OSBE-ODIHR