Zgjedhjet në Francë/ E djathta ekstreme fituese e raundit e parë! Macron dhe e majta aleatë në raundin II të ndalin Le Pen të marrë shumicën absolute

Partia e ekstremit të djathtë, ”Rassemblement national” (RN) i Marine Le Pen ka dalë fituese në raundin e parë të zgjedhjeve të parakohshme parlamentare të mbajtura në Francë më 30 qershor.

Sondazhet e kryera nga Ipsos, Ifop, OpinionËay dhe Elabe parashikuan që partia e Le Pen do të fitojë rreth 34 për qind të votave.

Projeksionet tregojnë se  aleanca e krahut të majtë e Frontit të Ri Popullor ka fituar 28.5-29.1 për qind të votave, ndërkaq forcë e tretë radhitet aleanca centriste e presidentit fracez, Emmanuel Macron me 20.5-21.5 për qind. 

Konkretisht projektohet që e djathta ekstreme të marrë midis 240 deri në 270 vende në Asamblesë Kombëtare, dhoma e ulët e parlamentit. Për të siguruar një shumicë absolute një partie i duhen 289 deputetë, ndërkohë që Aleanca e Macron pati vetëm 250 vende në Asamblenë që po largohet dhe duhej të gjente mbështetje nga partitë e tjera çdo herë për të miratuar një ligj. 

Fronti i Ri Popullor i së majtës projektohet me 180 deri 200 vende, ndërsa aleanca e Macron përllogaritet nga 60 deri në 90 shkruan  La Repubblica

Udhëheqësja franceze e ekstremit të djathtë, Marine Le Pen, u bëri thirrje votuesve që t'i japin RN një "shumicë absolute" në parlament gjë që do të mundësonte formimin e një qeverie të re me presidentin e partisë, Jordan Bardella si kryeministër, në mënyrë që të punonte për "rimëkëmbjen" e Francës.

“Do të jem kryeministri i të gjithëve”, tha ai në një prononcim për gazetarët duke pretenduar se votimi i së dielës do të jetë një nga “më vendimtarët në të gjithë historinë”.

Pas raundit të parë të zgjedhjeve, Macron bëri thirrje për një aleancë "të gjerë" kundër ekstremit të djathtë gjatë raundit të dytë të zgjedhjeve.

"Përpara RN ka ardhur koha për një bashkim të gjerë, qartësisht demokratik dhe republikan për raundin e dytë" tha ai.

Jean-Luc Mélenchon, nga e majta thotë  "As një votë nuk do të shkojë për RN, kudo që të jemi të tretët do të tërheqim kandidatin tonë".

E njëjta linjë u mbajt më pas nga Raphael Glucksmann, lideri i Place Publique dhe një nga eksponentët kryesorë të koalicionit "Fronti i Ri Popullor".

Të drejtë vote në zgjedhjet e parakohshme parlamentare kishin 49.5 milionë votues.

Pjesëmarrja në raundin e parë të zgjedhjeve të përgjithshme në Francë ka qenë pothuajse rekord, teksa morën pjesë në zgjedhjeve pothuajse 70% e votuesve, asnjëherë kaq e lartë që nga viti 1981.

Sipas sondazheve, Le Pen pritet të ketë shumicën në Parlament dhe pas raundit të dytë që do të mbahet më 7 korrik duke i mundësuar që për herë të parë kjo parti e ekstremit të djathtë të jetë në pushtet, dhe për herë të parë që nga pushtimi naziste në Luftën e Dytë Botërore mund t’i japin kryetarit të kësaj partie, Jordan Bardella, 28 vjeç, shansin që të formojë Qeverinë.

Në raundin e dytë të zgjedhjeve që është caktuar të mbahet më 7 korrik do të garojnë ato njësi ku kandidatët nuk kanë arritur të fitojnë shumicë absolute në raundin e parë dhe më pas do të dihet përbërja përfundimtare e Asamblesë Kombëtare të Francës.

Rendit zhvillimet sipas orarit:

Të Fundit Të Parat

Xh.K/S.G/Shqiptarja.com

TAG:
• Zgjedhjet parlamentare
• france