FRANCË – OCDE: Përpjekjet e Ukrainës kundër korrupsionit të pamjaftueshme

/ATSH-AFP/ - Rezultatet e qeverisë ukrainase kundër korrupsionit janë momentalisht të pamjaftueshme sipas vlerësimit të bërë sot nga OCDE-ja, që duke përshëndetur vullnetin e Kievit për të luftuar këtë kataklizëm që kërcënon ekonominë shumë të paqëndrueshme të vendit, kërkon rezultate konkrete.
"Qeveria ka bërë hapa të konsiderueshme në politikën e saj anti-korrupsionit, reformat ligjore dhe institucionale. Por, për momentin ka dështuar në arritjen e rezultateve konkrete përsa i përket reformave ligjore", theksoi Organizata për Zhvillim dhe Bashkëpunim Ekonomik, në një komunikatë.
"Ukraina duhet të miratojë legjislacionin e ri të anti-korrupsionit dhe të nxjerrë para drejtësisë të korruptuarit", nënvizoi OCDE-ja.
"Jo të gjitha reformat janë ndjekur me përpikmëri", theksoi OCDE-ja që shprehu shqetësimin për mungesën e procedurave kundër zyrtarëve të korruptuar të ish-regjimit.
Organizata shqetësohet gjithashtu për përhapjen e korrupsionit në qeverinë e re dhe i rekomandon qeverisë ukrainase masa të ndryshme.
"Qeveria pro-perëndimore ukrainase, e cila erdhi në pushtet pas rënies së regjimit të ish-presidentit pro-rus Viktor Ianoukovitch, theksoi se lufta kundër korrupsionit, që ka bllokuar Ukrainën prej vitesh, do të jetë një nga prioritetet e saj.
"Korrupsioni i përgjithshëm ka qënë një ndër shkaktarët e ndryshimit të regjimit në Ukrainë në vitin 2014. Administrata e re është angazhuar të luftojë korrupsionin, një sfidë ambicioze duke patur parasysh krizën aktuale ekonomike dhe konfliktin në lindje të vendit", kujton OSBE-ja.

TAG:
• OSBE