Frika nga sulmet terroriste, Franca
mobilizon forcat e sigurisë në terren
Të gjitha lajmet për sulmet terroriste

Franca ka mobilizuar 115 mijë forca të sigurisë të cilat kanë dalë në teren pas sulmeve në Paris nga militantët e Shtetit Islamik. Ministri i Brendshëm francez, Bernard Cazeneuve ka deklaruar se gjatë natës së fundit në të gjithë territorin francez janë kryer 128 kontrolle. “6 atentate të këtij lloji u shmangën vetëm në sezonin e verës”, ka thënë Cazeneuve.



Ndërkohë një gjueti e madhe ka nisur për gjetjen e një prej terroristëve të dyshuar Salah Abdeslam. Ai besohet se fshihet në Belgjikë e për këtë, qeveria e këtij vendi ka rritur nivelin e kërcënimit terrorist, ndërsa dhe ndeshja miqësore me Spanjën është pezulluar. 


(Salah Abdeslam)

Presidenti francez Fransua Hollande pritet të fluturojë për në Uashington dhe në Moskë javën e ardhshme për bisedime me presidentin Barack Obama dhe atë rus Vladimir Putin. 

Sekretari amerikan i Shtetit , John Kerry ndodhet në Paris, ku pas bisedimeve me Presidentin deklaroi se Shtetet e Bashkuara do t’i qëndrojnë në krah Francës. Ai i përshkroi militantët e Shtetit Islamik si monstra psikopatë.



Në një tjetër zhvillim avionët ushtarakë francezë kanë vazhduar bombardimet kundër Shtetit Islamik, në Raqqa, në veri të Sirisë.

Hollande e homologu iranian nënvizojnë rëndësinë e negociatave ndërkombëtare për zgjidhjen e konfliktit në Siri

Presidenti francez, François Hollande dhe homologu iranian, Hassan Rohani kanë vënë theksin tek rëndësia e negociatave mes fuqive të mëdha për zgjidhjen e konfliktit në Siri gjanë një bisede telefonike, tha presidenca franceze.

“Dy drejtuesit nënvizuan gjithashtu rëndësinë për të luftuar me të gjitha forcat e tyre kundër Daech (akronim në arabisht i Organizatës së Shtetit Islamik) dhe terrorizmit”, shtoi i njëjti burim.

“Ata gjithashtu ranë dakord për të gjetur një datë të shpejtë për një vizitë të Rohanit në Francë që parashikon riforcimin e bashkëpunimit dypalësh”, theksoi Elyse.
Pas atentateve në Paris, presidenti iranian shtyu një vizitë që duhet të niste të shtunën në Itali për të vijuar të hënën në Francë.

Fuqitë e mëdha, përfshirë SHBA-në, Rusinë, Bashkimin Evropian, vendet arabe dhe Iranin, ranë dakord të shtunën për një kalendar të tranzicionit politik, një hap i rëndësishëm pas sulmeve xhihadiste që shkaktuan të paktën 129 të vdekur dhe 352 të plagosur në Paris
 
Redaksia Online
(u.s/shqiptarja.com)