Ftesa e Trump/ Qeveria miraton aderimin e Shqipërisë në Bordin e Paqes, nesër ratifikohet në Kuvend! Zbardhet marrëveshja: Jo detyrime financiare, vetëm kontribute vullnetare në një fazë të dytë (DOKUMENTET)

Deputetët e Partisë Demokratike pritet të votojnë pro anëtarësimit të Shqipërisë në Bordin e Paqes së presidentit Donald Trump.

Në një mesazh dërguar deputetëve demokratë thuhet se pavararësisht shkeljes së të gjitha rregullave procedurale kushtetuese dhe të Rregullores së Kuvendit nga ana e mazhorancës, grupi parlamentar do të marrin pjesë në seancën parlamentare për ratifikimin e marrëveshjes së pranimit të Republikës së Shqipërisë, përfaqësuar nga kryeministri Edi Rama, në Kartën e Bordit të Paqes.

Në mesazhin telefonik thuhet se ky qëndrim vjen si mbëshetje ndaj përpjekjeve/angazhimit të presidentit të SHBA-ve për paqen dhe sigurinë globale.

Mesazhi derguar deputetëve të PD:

Të nderuar kolegë,

Nesër në orën 09:00 do të zhvillojmë mbledhje të Grupit Parlamentar në seli, lidhur me seancën e sapo njoftuar plenare. 

Pavarësisht shkeljes së të gjitha rregullave procedurale kushtetuese dhe të Rregullores së Kuvendin, si një provokim të ulët ndaj opozitës dhe qytetarëve shqiptar, nga njëriu që nërçin e tij me SHBA dëshiron tia imponojë Shqipërisë apo të mashtrojë shqiptarët sikur kjo nuk ekziston, ne DO TË MARRIM PJESË nesër në seancë, si mbëshetje ndaj përpjekjeve/angazhimit të Presidentit të SHBA për paqen dhe sigurinë globale.

Lutem të sigurohet pjesëmarrja! Faleminderit

Bordi i Paqes prezantohet si një organizatë ndërkombëtare, me misionin për të ushtruar funksione të ndërtimit të paqes, stabilitetit dhe rindërtimit në territore të prekura nga konflikti, në përputhje me të drejtën ndërkombëtare dhe dispozitat e Kartës së tij themeluese.

Anëtarësimi në Bord nga shtetet anëtare, realizohet nëpërmjet të ftesës nga kryetari dhe njoftimit formal të pëlqimit për të qenë të lidhur. Shtetet mund të përfaqësohen në Bord nga Kreu i shtetit ose Kreu i qeverisë.

Karta e Bordit të Paqes garanton ruajtjen e sovranitetit të shteteve anëtare, duke parashikuar se asnjë dispozitë e saj nuk i jep Bordit juridiksion brenda territorit të një shteti anëtar dhe as nuk e detyron një shtet anëtar të marrë pjesë në një mision specifik ndërtimi paqeje pa pëlqimin e shprehur të shtetit.

Çdo shtet anëtar ka një mandat trevjeçar nga data e hyrjes në fuqi të Kartës, subjekt i rinovimit nga Kryetari i Bordit të Paqes. Ky afat trevjeçar nuk zbatohet për shtetet anëtare, të cilat kontribuojnë më shumë se një miliard dollarë amerikanë (1 000 000 000 USD) në fonde monetare (“cash”) brenda vitit të parë nga hyrja në fuqi e Kartës.

Anëtarësimi përfundon në rastin më të hershëm me:

(i) përfundimin e një mandati trevjeçar dhe rinovimit nga Kryetari;

(ii) tërheqjen

(iii) një vendim nga Kryetari,

 (iv) shpërbërjen e Bordit të Paqes në

Megjithatë, një shtet i tillë mund të ftohet përsëri të bëhet shtet anëtar.

Bordi drejtohet nga një kryetar, i cili ushtron funksione vendimmarrëse përmes Bordit të Shteteve Anëtare dhe Bordit Ekzekutiv.

Vendimet merren me shumicë votash, por kërkojnë konfirmimin e Kryetarit, i cili gëzon gjithashtu të drejtën e vetos dhe autoritetin përfundimtar interpretues.

Bordi do të financohet nëpërmjet kontributeve vjetore vullnetare të vendeve anëtare. Gjithashtu, do të krijohen llogari për përmbushjen e këtij misioni.

Ditën e nesërme do të zhvillohet seancë plenare në Kuvend, në orën 10:00, për të ratifikuar aderimin e Shqipërisë në Bordin e Paqes për Gazën.

Sipas urdhrit të kryetarit të Kuvendit Niko Peleshi, siguruar nga gazetarja Esiona Konomi, seanca do të mblidhet me kërkesën e 1/5 së deputetëve të Grupit Parlamentar të PS.

I. Mbledhjen e Kuvendit në seancë plenare në datën 22.1.2026, ora 10:00.

II. Rendi i ditës i seancës plenare është si më poshtë:

Njoftime.

Projektligji “Për miratimin, në parim, të marrëveshjes së pranimit të Republikës së Shqipërisë, paraqitur nga Kryeministri, Edi Rama, në Kartën e Bordit të Paqes”.

Grupi Parlamentar i PD ka deklaruar se nuk është njoftuar nga kryetari i Kuvendit, për mbledhje të seancës plenare ditën e nesërme, për të ratifikuar aderimin e Shqipërisë në Bordin e Paqes për Gazën.

Përmes një njoftimi, grupi i PD thotë se me vendim të njëanshëm të mazhorancës, nuk është përcaktuar të ketë seancë plenare këtë javë dhe se duhen lajmëruar lajmëruar dy ditë përpara.

Njoftimi i Grupit Parlamentar të PD

Të nderuar kolegë,

Në përgjigje të interesit të disa prej mediave, për pjesëmarrjen ose jo në një seancë plenare të supozuar pë t'u zhvilluar nesër, ju bëjmë me dije se deri në orën 16.40, Grupi Parlamentar i Partisë Demokratike nuk ka marrë asnjë njoftim nga Kryetari i Kuvendit për mbledhje të seancës plenare gjatë kësaj jave. Me vendim të njëanshëm të mazhorancës në seancën plenare të datës 19.01.2026, në Kalendarin e Punimeve të Kuvendit, është përcaktuar që këtë javë nuk ka seancë plenare. Seanca plenare e rradhës është planifikuar për tu zhvilluar në datën 27 Janar.

Dëshirojmë të sjellim në vëmendjen tuaj se sipas pikës 3, të nenit 27/1 të Rregullores së Kuvendit, mbledhja e seancës plenare dhe rendi i ditës, i njoftohen deputetëve dhe publikut, si rregull 7 ditë përpara, por jo më vonë se 2 ditë përpara datës së caktuar për seancë plenare.

Transparenca dhe llogaridhënia ndaj qytetarëve i dikton Kuvendit të Shqipërisë, që për secilën çështje, për secilën vendimmarrje, të respektojë rregullat e parashikuara nga Kushtetuta dhe Rregullorja e Kuvendit, në respekt edhe të përgjegjshmërisë që duhet të tregojë secili deputet gjatë ushtrimit të funksionit të tij kushtetues.