Monedha e përbashkët europiane është forcuar dje për të tretën ditë radhazi, duke u këmbyer me 132.49 lekë. Sipas ekspertëve të kursit të këmbimit, me fundin e sezonit turistik, duhet të shuhen edhe efektet sezonale dhe fundi i muajit gusht do të shoqërohet me një forcim të valutës. Megjithatë, ata tregohen skeptikë për forcimin e euros, duke qenë se nuk ka pasur rritje të vëllimeve tregtare.

Ndërkohë, valuta e përbashkët evropiane ka vijuar të forcohet edhe në tregjet ndërkombëtare, ku ka shënuar nivelin më të lartë të tetë viteve të këmbimit me paundin britanik. Ndërkohë, duket se rigjallërimi gradual ekonomik i Eurozonës, gjithashtu, po çon në forcimin e euros kundrejt dollarit. Aktualisht, norma e këmbimit është një euro/ 1.18 dollar.

Forcimi i lekut kundrejt monedhës europiane është shënuar gjatë gjithë periudhës maj-qershor. Kursi i këmbimit ishte më i qëndrueshëm në periudhën shkurt-prill, rreth vlerës 135.5 lekë/euro, por ra në 134.6 lekë/euro në muajin maj dhe, më tej, në 133.2 lekë/euro në muajin qershor.

Banka e Shqipërisë, në një analizë të posaçme për zhvillimet në kursin e këmbimit, analizon se hyrjet e valutës në ekonomi kanë qenë ndjeshëm më të larta se daljet dhe një pjesë e tyre është përkthyer si tepricë oferte valutore në treg.

Ecuria, sipas Bankës së Shqipërisë, ka reflektuar mbiçmimin më të fortë të lekut kundrejt euros gjatë kësaj periudhe, në një kohë që ai ka vijuar të forcohet me ritme të njëjta kundrejt monedhave të tjera të shportës. Në terma realë vjetorë, leku është mbiçmuar me mesatarisht 4.4% në tremujorin e dytë, nga 4% një tremujor më parë.

Redaksia Online
D.T/Shqiptarja.com