Në fjalën e saj hapëse të mbledhjes, kryetarja e komisionit Arta Dade tha se është një nder që në mbledhjen e sotme i pranishëm është edhe ambasadori Gaiani, ndërsa shprehu mirënjohjen për avokatinë që shteti fqinj ka bërë për proceset integruese të Shqipërisë. Dade tha ndër të tjera se mosprezenca e opozitës në komision është një zgjedhje e tyre politike pasi për integrimin dhe marrëdhëniet me Italinë nuk ka dallime mes palëve.
Ambasadori Gaiani shprehu bindjen për një përgjigje pozitive nga Këshilli i Ministrave të Jashtëm të BE-së ditën e sotme lidhur me statusin kandidat të Shqipërisë, duke ripërsëritur se vendi ynë e meriton plotësisht.
Gaiani theksoi se mes Shqipërisë dhe Italisë ekzistojnë marrëdhënie të shkëlqyera por shtoi se ka akoma mundësi për t’i forcuar. Ai tha se shtatë fushat e përcaktuara në deklaratën e 4 viteve më parë, ku njëra është integrimi, janë ende aktuale duke shtuar Itali e ka mbështetur dhe e mbështet integrimin e Shqipërisë.
Ambasadori italian u ndal edhe tek fakti se sot Italia do të marrë Presidencën e BE-së, ku theksoi se prioritet për shtetin fqinj do të jetë procesi i zgjerimit.
Në këtë kuadër Gaiani tha se integrimi i Ballkanit është në të mirë të Europës, dhe se Italia dhe ai personalisht janë pro këtij zgjerimi, si plotësim i Europës për atë çka i mungon. Lidhur me rëndësinë që Italia do t’i japë zgjerimit të BE-së, Gaiani nënvizoi se Ministria e Jashtme Italiane do të kryejë vizita në të gjitha vendet e rajonit në korrik.
Ambasadori Gaiani iu rikthye edhe një herë marrëdhënies me Shqipërinë, ku theksoi ndër të tjera se marrëdhëniet ekonomike mes dy vendeve janë të shkëlqyera dhe se nismat e marra nga qeveria e nxisin edhe më tepër këtë marrëdhënie. Ai tha se për këtë duhet parë edhe mundësitë që ofron Shqipëria, duke shtuar se do të nënshkruhet një protokoll i ri në kuadër të bashkëpunimit për zhvillim që për 3 vjet do të investojnë 80 milionë euro në disa sektorë.
Gaiani tha se Italia mbështet edhe reformën territoriale dhe se vetë shteti fqinj do të jetë nxitëse e kësaj reforme ku do të vërë në dispozicion edhe burime financiare në vlerën e 800 milionë eurove, në kuadër të projektit “STAR”.
Sa i përket marrëdhënieve ndërparlamentare ndërmjet dy vendeve, Gaiani tha se me 1 korrik do të zhvillohet një mbledhje me grupin parlamentar të miqësisë Shqipër-Itali.
Deklaratat e ambasadorit italian Massimo Gaiani në Komisionin e Jashtëm vijnë në ditën kur Ministrat e Jashtëm të BE-së do të vendosin pë statusin kandidat.
Redaksia Online
(e.c/shqiptarja.com)