Gara për Prokurorin e Përgjithshëm/ KLP ‘harron’ Kodin Civil, Komisioneri Publik: Po punojmë me kapacitet të plotë

Është shtyrë për ditën e mërkurë mbledhja e Këshillit të Lartë të Prokurorisë, e cila ishte parashikuar për t’u zhvilluar ditën e sotme.

Këshilli i Lartë i Prokurorisë pritej që sot të miratonte listën e kandidatëve që kanë shprehur interes për pozicionin e Prokurorit të Përgjithshëm.

Shkak i shtyrjes së mbledhjes së Këshillit të Lartë të Prokurorisë është bërë mosmbërritja zyrtarisht e letrës së Komisionerit Publik për ankimimin ose mosankimimin  e vendimit të KPK-së së datës 4 Shtator 2019, për kandidatin Olsian Çela.

Për shtyrjen e mbledhjes së KLP-së, përmes një njoftim për mediat Institucioni i Komisionerëve Publikë, ka sqaruar arsyen pse nuk ka pasur një njoftim për KLP lidhur me Olsian Çelën.

Institucioni i Komisionerëve Publikë, thotë se afati i fundit për të ankimuar vendimin ose jo, ishte data 21.9.2019, që i binte e shtunë, ndërsa mbështetur në ligj, afati për paraqitjen e ankimit mbaron ditën e punës që vjen pas asaj të pushimit. (Sot)

“Komisionerët Publikë kanë afat 15 ditë, nga data e njoftimit të vendimit të Komisionit të Pavarur të Kualifikimit, për ta ankimuar pranë Kolegjit të Posaçëm të Apelimit.

Nisur nga fakti që afati 15-ditor, në rastin konkret, mbaronte më datë 21.9.2019, ditë e shtunë,  bazuar në nenin 148 të Kodit të Procedurës Civile dhe nenit 56 të Kodit të Procedurave Administrative, afati për paraqitjen e ankimit mbaron ditën e punës që vjen pas asaj të pushimit, pra sot, e hënë, datë 23.9.2019.

Komisionerët Publikë, duke qenë institucioni i vetëm, ndër tri institucionet e rivlerësimit, që në bazë të ligjit, kompetencën e tij kushtetuese për të ankimuar ose jo vendimet e Komisionit të Pavarur të Kualifikimit, e ushtron brenda një afati të prerë kohor, 15 ditë, janë duke përmbushur detyrimet e tyre me kapacitet të plotë.”, -thuhet në njoftimin e Institucioni i Komisionerëve Publikë.

KPK-ja vendosi me datë 4 shtator që të konfirmonte në detyrë prokurorin Çela, por Këshilli i Lartë i Prokurorisë vendosi të presë përgjigjen e Komisionerit Publik nëse do të ankimojë ose jo vendimin e saj.

Për postin e Prokurorit të Përgjithshëm, kanë shprehur interes Arta Marku, e cila është kryeprokurore në detyrë, si dhe Olsian Çela, Fatjona Memçaj dhe Lulzim Alushaj.

TAG:
• Olsian Çela
• KLP
• keshilli i larte i prokurorise