Gati nisja e punimeve në pjesën 
 lindore të Unazës së Tiranës

Ndërkohë që sapo kanë filluar punimet në pjesën e Unazës së Madhe që do të lidhë segmentin aktualisht të përfunduar me atë te zona nga “Pallati me Shigjeta” tek “Kristali”, qeveria ka hedhur hapat e para për përgatitjen e terrenit për ndërtimin e pjesës lindore të këtij segmenti.

Deri tani, kjo pjesë nuk ka filluar. Ajo nis tek rrethrrotullimi i qendrës tregtare TEG për të kaluar nëpërmjet Farkës, tek ish-Kombinati i Traktorëve, Kinostudio, duke përfunduar në Babrru.

Në një njoftim nga Kryeministria mësohet se Këshilli i Ministrave vendosi dje shpronësimin, për interes publik, të pronarëve të pasurive të paluajtshme, pronë private, që preken nga ndërtimi i segmentit rrugor “Unaza Lindore Tiranë (lotet I, II)”. Pronarët e pasurive të paluajtshme, që shpronësohen, do të kompensohen në vlerë të plotë për pasuritë “arë”, “truall”, “pyll” dhe “objekte”, në vlerën 129.7 milionë lekë. 

Brenda 30 ditëve Hipoteka do të fillojnë procedurat për hedhjen e trupit të rrugës mbi hartat kadastrale dhe do të fillojë edhe procesin e kalimit të pronësisë, për pasuritë e shpronësuara, në favor të shtetit.

Redaksia Online
(f.s/shqiptarja.com)