Kek festiv me fruta
Përbërësit:
4 kokrra vezë
100 gr sheqer kaf
100 gr gjalpë të shkrirë
50 ml vaj ulliri
150 ml qumësht i vakët
280 gr miell për ëmbëlsira
1 bustinë pluhur pjekës
1 lugë vanilje të lëngshme
150 gr fruta pylli
Për dekorim:
Fruta pylli
Gjethe mente
Përgatitja:
Fillimisht rrahim (me rrahëse elektrike) vezët me sheqerin kaf derisa masa të bëhet një marengë e qëndrueshme. Hedhim në të shumë ngadalë gjalpin e shkrirë të përzier me vajin e ullirit. Shtojmë qumështin e vakët dhe më pas hedhim miellin duke e situr. Tek mielli kemi shtuar fryrësin dhe vaniljen. Në këtë moment e fikim rrahësen dhe shtojmë frutat e pyllit, të cilat i kemi pudrosur me pak miell. E përziejmë lehtë brumin me një spatul kuzhine dhe e hedhim në një formë keku. E vendosim kekun të piqet në furrë në temperaturën 170 gradë Celsius për rreth 40-45 minuta.
Pasi keku të jetë pjekur e lemë të ftohet dhe më pas e dekorojmë me fruta pylli dhe gjethe mente.
