Gërdeci, 3 muaj ulje dënimi për 
Ngjecin, në burg vetëm Minxolli

TIRANE –Një tjetër nga të dënuarit kryesorë për tragjedinë e 6 viteve më parë në Gërdec, është drejt lirisë. Gjykata e Tiranës bën një tjetër ulje dënimi për një nga të pandehurit, duke ulur me 90 ditë dënimin e Sokol Ngjeçit. Ai është dënuar me 10 vite burg, dhe tashmë pas kësaj uljeje i kanë mbetur dhe 14 muaj burg.

Me daljen nga burgu  të Ngjeçit, nga 29 të pandehurit për shpërthimin makabër në punishten e demontimit të armëve dhe municioneve që mori 26 jetë mes të cilëve gra dhe fëmijë të mitur, ndërkohë u plagosën mbi 300 të tjerë, mbetet vetëm Dritan Minxholli.

Ngjeçi ka qenë punonjës i kompanisë MEICO, dhe duhet të kontrollonte pikërisht fabrikën e demontimit në Gërdec, ku si pasojë e veprimeve dhe mosveprimeve, ka shkaktuar edhe tragjedinë. Ai u dënua me 10 vite burg, ndërsa gjykatat vazhdojnë t’i favorizojnë këta të pandehur. “Sokol Ngjeçi i është drejtuar Gjykatës së Tiranës më datë 18 mars 2014, me kërkesë duke kërkuar uljen e dënimit në masën 90 ditë. Ai është dënuar nga Gjykata e Tiranës me 10 vjet burgim, për kryerjen e veprave penale të parashikuara nga nenet 289/2 dhe 161 te K. Penal. Ky vendim është lënë në fuqi nga Gjykata e Apelit e Tiranës. Aktualisht kërkuesi vuan dënimin në Burgun e Vaqarrit që prej datës 15 shkurt 2013”-thuhet në vendimin e gjykatës, e cila i referohet dinamikës së vuajtjes së dënimit në këtë burg.

Nga personat e akuzuar si përgjegjës kryesorë të kësaj tragjedie kanë mbetur në burg vetëm Dritan Minxolli dhe Sokol Ngjeçi (i cili lirohet për 14 muaj), ndërsa dy të akuzuarit kryesorë, Ylli Pinari ish-drejtori i  MEICO dhe Mihal Delijorgji ish-drejtori I fabrikës së demontimit të armëve në Gërdec, "AlbaDemil" janë në liri.

Redaksia Online
(Gre.M/Shqiptarja.com)