Gjenevë, Meta takohet me Kanaan 
Shqiptarët, kontribut i vyer në qytet

ZVICER- Kryetari i Kuvendit, Ilir Meta, gjatë pjesmarrjes së tij në punimet e Sesionit të 131 të Unionit Ndër-Parlamentar, është pritur, ditën e sotme, në një takim të veçantë nga Kryetari i Bashkisë së Gjenevës, Sami Kanaan.

Gjatë takimit, Meta u shpreh se Gjeneva është një qytet i rëndësishëm për botën dhe në veçanti për Shqipërinë, kjo falë dhe komunitetit domethënës shqiptar në Qytet dhe në të gjithë Kantonin.

"Kjo diasporë e mirëintegruar në Zvicër, përfaqëson një urë të fortë lidhëse dhe bashkëpunimi mes dy vendeve tona, dhe si e tillë duhet t'a vendosim në funksion të intensifikimit të shkëmbimeve mes dy vendeve"- deklaroi gjatë pritjes, Kryetari i Kuvendit, Meta.

Gjithashtu, në kuadër të bashkpunumit nderkulturor mes vendeve,Ilir Meta shprehu mirënjohjen për mbështetjen dhe vëmendjen që Bashkia e Gjenevës i dedikon komunitetit shqiptar dhe projekteve të tyre komunitare.

Nga ana e tij, Kryetari i Bashkisë së Gjenevës, Kanaan pasi shprehu kënaqësinë për vizitën e Kryetarit të Kuvendit të Shqipërisë, në Gjenevë, theksoi se komuniteti shqiptar jep një kontribut të vyer për jetën multi-kulturore zvicerane. Sipas Kanaan, qyteti që administron, Gjeneva, në këtë drejtim ka luajtur një rol parësor duke mbështetur komunitetin me etni shqiptare.

Gjithashtu Kryetari i Kuvendit, Meta dhe Kryebashkiaku i Gjenevës, Kanaan ishin në një mendje mbi domosdoshmërine e forcimit të bashkëpunimit, veçanërisht në fushat e trashëgimisë kulturore dhe turizmit. Për të forcuar këtë aspect, vetë Meta e ftoi Kanaan të zhvillojë një vizitë në Shqipëri së shpejti.

Redaksia Online
(e.n/Shqiptarja.com)