Gjermania masa të reja anti-COVID, të pavaksinuarve nuk do t'ua paguajë karantinimin

Nëse nuk jeni vaksinuar dhe infektoheni me COVID-19, atëherë nuk do të paguheni gjatë periudhës së karantinimit, është kjo masa më e re e marrë nga Gjermania. Ministri gjerman i Shëndetësisë Jens Spahn tha se është e padrejtë që t’iu kërkohet taksapaguesve një gjë e tillë për personat që refuzojnë të imunizohen.

Rregullat, të cilat do të nisin së zbatuari nga 16 landet e Gjermanisë, do të hynë në fuqi më 11 tetor. Këto rregulla do të vlejnë për personat që rezultojnë pozitivë me COVID-19 dhe ata që kthehen nga shtetet që konsiderohen me “rrezik të lartë”.

Udhëtarët e pavaksinuar nga lista e atyre shteteve, duhet t’i nënshtrohen karantinimit për të paktën pesë ditë. Ata që janë të vaksinuar apo së fundmi kanë tejkaluar sëmundjen COVID-19, që shkakton koronaviursi, nuk kanë nevojë të zbatojnë këtë masë. Kritikët deklarojnë se rregullat e reja janë të barabarta me vaksinim të detyrueshëm, pasi punëtorët nuk mund të qëndrojnë nëpër shtëpi pa u paguar.

 “Ka të bëjë me korrektësinë. Ata që mbrojnë veten dhe të tjerët përmes vaksinimit, mund të pyesin me të drejtë se pse ne duhet të paguajmë për ata që kanë përfunduar në karantinë pas pushimeve në zona të rrezikut”, tha Spahn.

Vaksinimi nuk është i detyrueshëm në Gjermani, mirëpo autoritetet kanë marrë masa për ta bërë gjithnjë e më të papërshtatshme situatën për të pavaksinuarit.

Testet për koronavirus, që u kërkohen njerëzve për të drekuar nëpër restorante, nuk do të jenë më falas nga 11 tetori.

/r.k./Shqiptarja.com

TAG:
• gjermani
• Koronavirus
• Vaksina Covid