Gjirokastër, kapen 75 kg drogë
mariuana doli nga Lazarati

TIRANE- Policia e Gjirokastrës bën të mundur sekuestrimin e një sasie prej 75.4 kilogramë mariuanë. Gjatë operacionit “Pacarela” rreth orës 01:30 të mëngjesit kanë marrë informacion në rrugë operative se një sasi lënde narkotike po transportohej nga Lazarati në drejtim të Përmetit me destinacion kufirin jeshil për në shtetin grek.

Autorët me lëndën narkotike do të kalonin nga kodrat e fshatit Hormovë për në fshatin Lekël e më pas për Përmet me qëllim shmangien e postobllokut të Policisë që funksionon 24 orë në Ujin e Ftohtë Tepelenë. Uniformat blu kanë bërë të mundur kapjen e njërit prej transportuesve, ndërsa shtetasi tjetër ka hedhur çantën me lëndë narkotike dhe është larguar me shpejtësi shtratit të lumit Drino duke përfituar nga errësira dhe terreni i vështirë.

 Nga kqyrja që iu bë çantave nga ana e grupit hetimor rezultoi se në dy çantat kishte 60 pako, me peshë të ndryshme që varionin nga 1.2 deri në 1.4 kilogramë secila, gjithsej rreth 75.4 kilogramë mariuanë, e cila u sekuestrua në cilësinë e provës materiale. Policia arrestoi në flagrancë shtetasin Landi Zoi, lindur dhe banues në Frakull e Madhe Fier, i dënuar më parë me 5 vite burg në shtetin grek për veprën penale të “Trafikut të Qenieve njerëzore”. Gjithashtu është bërë shpallja në kërkim policor e dy shtetasve të tjerë pjesëtarë të këtij trafikut të lëndës narkotike edhe këta nga qyteti i Fierit.

TAG:
• lazarat