Me dhjetëra qytetarë kanë dalë në protestë në Vlorë, kundër Muzeut Hebraik që është planifikuar të ndërtohet në lagjen ‘Muradije’ të qytetit.

Gjatë protestës janë shënuar edhe përplasje mes protestuesve e forcave të Policisë, të cilët kanë ndërhyrë për të shpërndarë të pranishmit.

Protesta vjen pasi ditën e djeshme Gjykata Administrative e Shkallës së Parë Lushnjë ka pranuar kërkesën për sigurimin e padisë, duke vendosur pezullimin e punimeve për ndërtimin e Muzeut Hebraik, në monumentin pranë ish-Klubit Patriotik “Labëria” në Vlorë.

Sot protestuesit shkuan në shenjë simbolike për të treguar se beteja u fitua prej tyre. Njëri prej protestuesve tenton të çajë rrethimin dhe të kalojë gardhin metalik që është vendosur rreth vendit ku planifikohej ndërtimi i Muzeut Hebraik.

Policia ka shkuar ta kapë e ta shoqërojë dhe aty u krijua një moment tensioni. Në momentin që protestuesi u neutrazilua dhe u fut në furgon, situata u normalizua.

Padia në Gjykatë ishte bërë nga përfaqësuesit e nismës për mbrojtjen e monumentit dhe nga persona që kanë kundërshtuar ndërhyrjet pranë monumentit. Po ashtu, 1034 qytetarë kanë firmosur një peticion kundër këtyre punimeve për ndërtimin e Muzeut Hebraik.

Në Vlorë janë zhvilluar edhe disa protesta të tjera kundër ndërtimit të Muzeut Hebraik, ku edhe më parë janë shënuar përplasje mes protestuesve e Policisë.