Gjyqtarja Majlinda Andrea, e përfshirë në skandalin e korrupsionit 50 mijë eurosh në Gjykatën e Lartë, ka qënë pjesë e treshes gjykuese që, në vitin 2003, vendosi t’i heqë pronësinë mbi ish-hotel “Vollgës” kompanisë arabe “Saudi Brothers Commercial Company” dhe t’ia japë këtë pronësi shtetasit Zanmir Hasa, i cili pretendon se është trashëgimtari i Alie Fortuzit.

Ky vendim i dhënë në 13 mars 2003 nga treshja gjykuese Flora Hysi, Luljeta Topalli dhe Majlinda Andrea, shënon dhe nisjen e konfliktit të tejzgjatur të gjyqeve mes kompanisë arabe “Saudi Brothers Commercial Company” dhe shtetasit Zanmir Hasa. Tashmë konflikti mes këtyre dy subjekteve është duke u hetuar nga Prokuroria e Durrësit dhe ajo e Krimeve të Rënda, për shkak të një seri veprimesh dhe vendimesh të paligjshme.

Vendimi i 2003-ës ka shumë gjasa që të jetë dhënë duke u ndikuar nga korrupsioni, kjo pasi treshja gjykuese, ku ka qënë pjesë dhe gjyqtarja Majlinda Andrea, ka vendosur të nxjerë të pavlefshme kontratën e shit-blerjes të kryer mes kompanisë “Saudi Brothers Commercial Company” dhe shtetasit Agim Sula, i cili ka qënë nipi i trashëgimtares së vetme të kësaj prone Alie Fortuzi.

Mirëpo, pas vdekjes së saj, Zanmir Hasa, njeriu që dikur punonte si kopshtar në shtëpinë e Fortuzit në Selanik dhe që më pas adoptohet prej të moshuarës si “fëmijë”, vjen në Shqipëri dhe hap proces gjyqësor kundër kompanisë arabe, e cila e kishte blerë pronën kundrejt 800 mijë eurove.

Çuditërisht, trupi gjykues, ku bënte pjesë dhe Majlinda Andrea, zhvillon një gjyq pa prezencën e të paditurve Abdullah Bawazeer dhe Agim Sula, duke vendosur të nxjerë të pavleshëm kontratën e shit-blerjes të vitit 1997 dhe t’i japë ish-hotel Vollgën shtetasit Zanmir Hasa.

vollga

Redaksia Online
(F.T/shqiptarja.com)