Grabitja e Rinasit, 5 të arrestuarit
lihen në burg 'pa vendim' gjyqëso

Katër nga pesë të arrestuarit për grabitjen në Rinas do të vijojnë të qëndrojnë në burg dhe tjetri në arrest shtëpie, edhe pse për ta ende nuk ka një vendim të drejtë për masë sigurie. Kjo për faktin se masat ndaj tyre janë dhënë në dy gjykata të ndryshme, fillimisht në Gjykatën e Krujës dhe më pas në atë të krimeve të Rënda, vendimi i kësaj të fundit është edhe në fuqi për të arrestuarit.
 
Por sot, Gjykata e Apelit për Krimet e Rënda shpalli moskompetencë për të rivlerësuar masën e sigurisë ndaj 5 të arrestuarve, çka rrëzon vlefshmërinë edhe të vendimit të Gjykatës së Shkallës së Parë për Krime të rënda.
 
Apeli për Krimet e Rënda shpalli moskompetecë për shqyrtimin e masave të sigurisë për 5 të arrestuarit me argumentimin se shpërdorimi i detyrës, akuza që rendon mbi të arrestuarit për grabitjen në Rinas, nuk shqyrtohet në këtë gjykatë.
 
Por kjo çështje i takon shqyrtim Gjykatës së Apelit Tiranë. Kështu, Bledar Blloshmi, Fadil Jonuzaj, Kujtim Picari, Arben Karafili do të vijojnë të qëndrojnë në burg. Ndërsa Vangjel Nikolla në arrest shtëpie.
 
Megjithatë, Prokuroria e Krimeve të Rënda do të bëj rekurs në Gjykatën e Lartë. Sipas organit të akuzës grabitja spektakolare e parave në pistën e Rinasit nuk mund të hetohet nga një prokurori tjetër.
 
Sipas akuzës të arrestuarit në bashkëpunim me njëri-tjetrin dhe role të ndryshme nuk kanë marre masa për të rritur sigurinë në aeroportin e Rinasit çka solli edhe grabitjen spektakolare të afro 1 milionë eurove pak javë më parë.









Redaksia Online
l.q/Shqiptarja.com

/Shqiptarja.com