GREQI - Merr fund pengmarrja në burgun e Malandrions në Greqi prej Alket Rizait. Me fjalët "Po dorëzohem, mori fund gjithçka, s'ka më kuptim asgjë", shqiptari i arratisur dy herë në mënyrë spektakolare nga burgjet greke i ka lënë gjallë pengjet dhe i është dhënë policisë. Rizai, që tha se kish lidhur në trup 500 gr.eksploziv,  mbajti peng gati 24 orë, tre gardianë dhe dy të burgosur.  Rreth orës 19: 0 të mbrëmjes së sotme, ai është dorëzuar nga lodhja dhe negociatave të pareshtura. Policia ka konstatuar se eksplozivi ishte një bllof; ai nuk kishte asgjë të tillë me vete.

Gazetari Ardi Stefa nga Athina tha se burimet nga policia greke bënë të ditur se Rizai nuk ka pasur eksploziv, por e përdori faktin për kërcënim; ai kishte me vete tre thika të punuara në mënyrë artizanale. Interesant është fakti se forcat e policisë nuk ishin të sigurtë për këtë, ndaj nuk ndërhynë për të mos rrezikuar pengjet. Gjithashtu, ai kishte veshur rrobat e njërit prej gardianëve, që kishte marrë peng, me qëllim që të mbrohej nga snaiperët dhe të arratisej nëse do ish e mundur ndonjë trazirë.

Rizai, i cili ka qenë në epiqendër të mediave greke për shkak të arratisjeve të tij të bujshme me helikopter, kërkoi lirimin nga burgu me një makinë në dispozicion. Në një gjendje tepër të rënduar psikologjike dhe jashtë kontrollit, sidomos pas përdorimit të gazit lotsjellës nga ana e policisë, ai i dha fund aventurës së rrezikshme.

Sipas dëshmive gjatë paradites së sotme, Alket Rizai paraqiste pamjen e një njeriu, i cili “nuk kish asgjë se çfarë të humbiste dhe ishte i vendosur për gjithçka”. Ky qëndrim i tij duket se i ka bindur edhe pengjet, katër gardianë dhe dy të burgosur, të cilët ende nuk dihet se çfarë roli luajtën në histori, në ishin pengje apo bashkëpunëtorë. Pengjet u bënë thirrje autoriteteve që të plotësonin kërkesat e Rizait dhe t’i jepnin menjëherë një automjet që të largohej, pasi jeta e tyre varej në fije të perit.

Gjatë gjithë natës së të shtunës duke gdhirë e diela, tentativat për lirimin e pengjeve vazhduan pa asnjë rezultat, pasi ishte e pamundur të komunikohej me Alket Rizain, pa iu plotësuar kërkesat. Orët dramatike shkuan drejt fundit rreth mbrëmjes së të dielës, kur lodhja bëri punën e vet, siç ishte parashikuar nga policia greke.

EMRAT E PENGJEVE DHE TË BASHKËPUNËTORIT SHQIPTAR TË RIZAIT
Ora 19:30 Dorëzohet Alket Rizai dhe liron pengjet me fjalët: "Dorëzohem, mori fund gjithçka, nuk ka më kuptim asgjë".

Ora 19:00  Informacione nga portalit Zougla.gr thonë se mbiemrat e katër gardianëve të marrë peng janë: Venecianis, Fuskas, Kutonias dhe Lambru. Mbiemri i pengut të pestë ende nuk është komunikuar. Rizai është veshur me rroba gardiani, që të mos u japë mundësi të diktohet nga snajperat, të cilët janë në vendngjarje
Ndërkohë bashkëpunëtori më i ngushtë i Rizait mban emrin ose pseudonimin Romeo. Emri i bashkëpunëtorit të dytë ende nuk dihet. Romeo duket se ka ushtruar dhunë mbi njërin nga pengjet.

POLICIA, GATI PËR TË NDËRHYRË
Ora 16:22 Avokati i Alket Rizait ka negociuar sërish me të për dorëzimin e tij dhe të pengjeve të marrë prej tij, por pa rezultat.

Ora 15:30 Gazetari Ardi Stefa raporti nga Athina se "vazhdon gjendja e tensionuar në burg; policia është duke pritur të ndërhyjë sapo Rizai të shfaqë lodhje. Po mbushen 24 orë që Rizai ka krijuar këtë situatë në burg. Ndërhyrja e policisë po shmanget, sepse policia po synon lodhjen e tij me qëllim që të bëjë një ndërhyrje prezice pa viktima.  Asgjë nuk bëhet publike rreth operacionit, por pavarësisht faktit se nga gardiani i shpëtuar u tha që Rizai ishte nën efektin e narkotikëve, një përshtypje imja si gazetar është se ai nuk ka përdorur të tillë dhe nuk mund të ishte kaq i thjellët në fjalë dhe veprime e të rezistonte kaq gjatë".
 
Ora 14:00 Policia po përgatit operacionin e ndërhyrjes në burg. Policët kanë hyrë në oborrin e brendshëm. Nga çasti në çast pritet të fillojë operacioni, gjithsesi urdhri është që të lihet Rizai të lodhet dhe pastaj të ndërhyjnë.

POLICIA SNAIPER ME KAMERA, PRITET TË NDËRHYJË
Ora 12:10 Korrespondenti i televizionit A1 REPORT në Athinë, Ardi Stefa, pavarësisht se misioni i policisë është mjaft i fshehtë, deklaron se policia greke ka snaiperë me kamera të cilët evidentojnë edhe ambientet e brendshme ku ndodhet Alketi. Sipas Stefës, kur policët të binden se çfarë armatimi ka Rizai dhe se si është situata aty, do përgatiten për një ndërhyrje të tyre e cila mund të finalizojë operacionin.

AVOKATI: MË KERKOI T’I ÇOJ NJË MAKINË, ËSHTË I VENDOSUR
Saki Kehajoglu, avokati i Alket Rizait ka deklaruar përmes telefonit për mediat greke se ka biseduar me klientin e tij. Përmes telefonit ai ka kërkuar një makinë për t’u larguar.

“Ose do të iki, ose do më vrasin” kështu më tha Alketi i vendosur në kërkesën e tij për t’i dërguar një makinë që të largohej dhe të lironte pengjet”, -kjo është deklaruar nga avokati i tij.  “I thashë Alketit se kjo situatë nuk ka rrugëdalje, ndaj të ketë kujdes njerëzit dhe veten. Më pas i kërkova të dashurës së tij greke që njihet me emrin Shula që të komunikojë më të dhe ajo i është lutur gjithashtu t’i japë fund pengmarrjes”- deklaron avokati Saki Kehajoglu. Ka qenë avokati që ka bërë të ditur se sipas bisedës që ka bërë me Alketin, ai mban një sasi prej 500 gr eksploziv C4.

ARRATISET NJË NGA PENGJET E ALKET RIZAIT
Ora 11:35 Ka mundur të arratiset njëri nga pengjet e mbajtur prej Alket Rizait. Ende nuk ka inforamcione se kush është i arratisur, nëse bëhet fjalë për të burgosur apo për një nga 4 gardianët e mbajtur peng.

NËNA: "ALKET, QËNDRO I FORTË" DHE I BEN  APEL TOPALLIT
Ora 11: 30 Qëndro i fortë, vazhdo rrugën që ke nisur. Me këto porosi i drejtohet nëna djalit të saj. Bëhet fjalë për Donika Rizain, nënën e Alket Rizait. Donika, e cila jeton në Ballsh, deklaron bindshëm se djali i saj është i pafajshëm dhe se duhet të qëndrojë fortë për të përfunduar qëllimin e tij, atë të arratisjes përfundimtare nga burgu i Malandrinos në Greqi.

E ëma e shqiptarit i drejtohet konkretisht kryeparlamentares Jozefina Topalli të cilës i kërkon që të ndërhyjë në këtë çështje e cila nga momenti në moment po merr përmasa të mëdha, gjithmonë me pretendimin se djali i saj është i pafajshëm

donika rizai alket rizai
(Nëna e Alketit, Donika Rizai, në banesën e tyre në Ballsh)

E DASHURA GREKE, NEGOCIATA PËR LIRIMIN E PENGJEVE
Rol në bisedimet për lirimin e pengjeve ka marrë përsipër edhe e dashura e tij greke, Aspasia Mitrushia (Shula), por deri tani nuk ka asnjë rezultat. Ndërkohë edhe avokati i Rizait, Sakis Kehajaoglu, i cili komunikoi me Rizain gjatë orëve të natës deklaron se klienti i tij është në një gjendje psikike shumë të trazuar dhe është i vendosur. Sipas avokatit ai është i veshur me lëndë eksplozive dhe kërkon makinë që të largohet. Edhe në këtë rast rol të rëndësishëm duket se luan e dashura e tij, Shula, e cila, ashtu si edhe avokati i tij i bëjnë thirrje që të dorëzohet dhe t’i japë fund kësaj historie, në mënyrë që të mos derdhet gjak i pafajshëm.

NEGOCIATA GJATË GJITHË NATËS, RIZAI S’LESHON PE
Agjencitë greke të lajmeve deri pasmesnate njoftonin, se mes policisë dhe pengmarrësit shqiptar, vazhdonin negociatat, por Rizai dukej i vendosur të mos “lëshonte pe”, derisa t’i krijohej mundësia e largimit nga burgu. Madje, mediat greke njoftonin gjithashtu, se situata ishte mjaft e rrezikshme, sepse dyshohet se ai është dhe nën ndikimin e substancave narkotike. Po ashtu, është bërë e ditur, se në përkrahje të tij, gjë që e bën situatën dhe më të vështirë, është edhe se një grup shqiptarësh, po të armatosur, janë në mbështetje të tij.

HISTORI PASIONI, NE 2003  VRAU NJË GREK
Do të ishte një histori pasioni ajo që do të bënte bumin e parë në shtetin helen. Në vitin 2003 Alket Rizai vrau një shtetas grek me dyshimin se kishte lidhje me të dashurën e tij ruse Oksana. Në fakt geku kishte vërtet një lidhje me një femër ruse, por emri i saj ishte Roksana. Vetëm mbi dyshimet e ngritura, shqiptari Alket Rizai vrau shtetasin grek.

RIZAI: DO TENTOJ GJITHMONË TË ARRATISEM
Në shtypin shqiptar në Greqi në gazetën Tribuna, Alket Rizai ka deklaruar se do të jetë gjithmonë i gatshëm për t’u arratisur nga burgu grekë. Ai ka deklaruar bindshëm se nuk do të pranojë të qëndrojë asnjëherë në burgjet greke. Ajo që ka rënë gjithmonë në sy të mediave greke e shqiptare, është fakti që Rizai ka thënë se edhe pasi të arratiset nuk do të largohet nga Greqia.

Megjithatë, Rizai i ka marrë të gjitha fajet përsipër, duke mos treguar asnjë fakt që mund të komprometonte askënd tjetër, as të dashurën e tij greke, Shula.

Shula ka qenë e arrestuar si bashkëpunëtore e shqiptarit me burgim të përjetshëm, pasi e ka ndihmuar të dashurin e saj të arratisej me helikopter. Lirimi i saj nga drejtësia greke është bërë pasi Rizai k marrë përsipër të gjithë autorësinë e veprimeve të tij.

KUSH ËSHTË ALKET RIZAI
Alket Rizai, është rreth 38 vjeç, nga Ballshi, i biri i Donikës dhe i Ramizit. Prej vitesh në Greqi, Rizai vuante dënimin për vrasjen e një qytetari grek, sipërmarrësin Thanasi Koropiotis, për të cilin dyshonte se kishte lidhje me të dashurën e tij ruse, Oksana.

ARRATISJA I
Mesditën e datës 4 qershor 2006, një helikopter ulet mbi burgun e Koridalosit në Greqi. Personat që gjenden në të hapin zjarr mbi gardianët, duke i çorientuar, ndërkohë që Rizai e Paleokostas ngjiten në mjetin fluturues e largohen pa asnjë shqetësim.

ARRATISJA II
Shqiptari nga Ballshi dhe miku i tij grek u arratisën sërish në të njëjtën mënyrë. Me ndihhmën e një helikopteri, ata u larguan nga burgu i sigurisë së lartë në Gramatiko. Alket Rizai u prangos sërish më 16 nëntor 2009,

AKUZAT
Alket Rizai ishte dënuar me burgim të përjetshëm për disa vrasje dhe për pjesmarrje në bandë të armatosur. Pas dy arratisjeve, gjykata ia shtoi dënimin edhe me 26 vjet të tjera burgim për largimet nga qelitë e dy burgjeve, nga ku u arratis në mënyrë spektakolare.

*Lajmi u publikua fillimisht në orën 23:00 të datës 16 mars/ Sot në përditësim të vazhdueshëm

Redaksia Online
(Gre.M/ar.sh/Shqiptarja.com)