Gripi, mjekët: Kujdes me
përdorimin e antibiotikëve

TIRANE- Mjeku infeksionit Pëllumb Pipero u ka bërë apel të gjithë pacientëve shqiptarë të bëjnë kujdes në përdorimin e antibiotikëve, duke u nisur edhe nga situata gripale që ka përfshirë vendin tonë. Ai ka sugjeruar që më parë të bëhet antibiograma për të përcaktuar se cili prej tyre u jep efekt dhe më pas të nisin kurën e duhur.

Sipas mjekëve çdo njeri mund të preket nga virusi i gripit stinor dhe ta përhapë atë tek të tjerët. Por disa njerëz janë në rrezik më të madh për t'u infektuar me virusin e gripit stinor ose të bëjnë komplikacione nga gripi. Në rrezik më të madh janë: fëmijët e vegjël nën 5 vjeç , sidomos deri në 2 vjeç; personat 65 vjeç e sipër; gratë shtatzëna si dhe personat me sëmundje kronike, si: astma, diabeti, sëmundjet e zemrës, sëmundjet e mushkërive, sëmundjet e veshkave, sëmundjet e mëlçisë, sëmundjet e gjakut, sëmundjet me ulje të sistemit imunitar si HIV/AIDS, kancer, etj. Kushte neurologjike, si epilepsia, distrofia muskulare, vonesa të rënda të zhvillimit, obezët. Ata këshillojnë se në rast temperaturash tepër të ulëta, dalja nga shtëpia të bëhet në orët më pak të ftohta të ditës, duke evituar mëngjesin e hershëm, si dhe orët e mbrëmjes. Shumë kujdes duhet të tregojnë personat me sëmundje kardiovaskulare ose të frymëmarrjes, të cilët duhet të vishen mirë para se të dalin. Është e rëndësishme që ushqimi të jetë i ekuilibruar. Duhen konsumuar patjetër dy litra lëngje në ditë, preferohet çaji apo lëngu i portokallit.
(sg/shqiptarja.com)

/Shqiptarja.com