Gruaja rome në jetën politike
Trajnimi 2-ditor i OSBE/ODHIR-it

POGRADEC - Masat që duhen marrë për rritjen e pjesëmarrjes së gruas rome në jetën publike dhe politike ishin fokusi i trajnimit dy-ditor të organizuar nga projekti i OSBE/ODIHR-it “Praktikat më të Mira për Integrimin e Romëve” (PMIR).

Rreth 20 gra rome dhe egjiptiane, me përvojë të ndryshme profesionale, përfshirë aktiviste të shoqatave, gjatë trajnimit mësuan më shumë rreth pjesëmarrjes aktive në proceset politike në vend. Edukimi mbi të drejtat individuale themelore, shërbeu si një pikënisje për këto gra për të kuptuar më mirë rëndësinë e pjesëmarrjes politike.

Nëpërmjet ushtrimeve praktike dhe role-play, pjesëmarrësit përfituan një kuptueshmëri më të thellë mbi avantazhet e pjesëmarrjes politike. Ato patën gjithashtu mundësinë të mësojnë më shumë mbi disa sfida me të cilat përballen si gra nëse ndërmarrin një karrierë politike, bazuar në përvojën konkrete të znj. Meleqe Rrënja dhe znj. Etleva Tare të cilat kanë kandiduar në zgjedhje të mëparshme elektorale vendore apo parlamentare në Shqipëri, përvojë që u nda prej tyre me pjesëmarrëset gjatë trajnimit.

"Nëpërmjet nxitjes së këtyre grave për t’u bërë aktive dhe për të ushtruar të drejtat e tyre politike të garantuara me ligj, ne nuk jemi vetëm duke siguruar pjesëmarrjen e grave Rome në jetën politike, por jemi gjithashtu duke kontribuar në barazinë në vendimmarrjen brenda komuniteteve të tyre”, tha Judith Kiers, Menaxhere e Projektit PMIR.

Ky trajnim ishte i fundit i tri trajnimeve të organizuara nga projekti PMIR për edukimin e votuesve dhe rritjen e pjesëmarrjes së romëve në jetën politike. Qëllimi i këtyre trajnimeve është rritja e pjesëmarrjes së romëve në proceset elektorale dhe fuqizimi i kapaciteteve të tyre për advokim politik të pavarur.

PMIR është një projekt rajonal i financuar nga Bashkimi Evropian, mbështetur nga Shtetet Pjesëmarrëse të OSBE-së. Projekti mbështet programet inovative për promovimin e pjesëmarrjes më të madhe të romëve në jetën politike dhe publike dhe në vendimmarrje, ndihmon në luftën kundër diskriminimit dhe kontribuon në përmirësimin e kushteve të jetesës.

Redaksia Online
(Gre.M/Shqitparja.com)

TAG:
• OSBE