Guvernatori i ri, Nishani kopjon
Ramën, hap aplikimin online

TIRANE - Presidenti Nishani kopjon kryeministrin Rama për përzgjedhjen e Guvernatorin e ri të Bankës së Shqipërisë. Një dit pas shkarkimit nga Kuvendi të ish-kreut të BSH-së, presidenti Nishani hapi garën për aplikimet online për kreun e ri të institucionet më të madh monetar në vend, metodë kjo e ndjekur edhe nga Kryeministri Rama për përzgjedhjen e anëtarëve të Këshillit Mbikëqyrës të BSH.

Nëpërmjet një komunikate për mediat, Nishani theksoi se do të hapen aplikimet online për shtetasit shqiptar që jetojnë në Shqipëri ose jo, për të konkurruar për kreun e ri të BSH. “Institucioni i Presidentit të Republikës, pas vendimit të djeshëm të shkarkimit të Guvernatorit të Bankës së Shqipërisë nga ana e Kuvendit të Shqipërisë, bazuar në nenin 161, pika 2 të Kushtetutës, njofton fillimin e procedurës së emërimit të Guvernatorit të ri. Për këtë qëllim, Presidenti i Republikës fton të gjithë shtetasit shqiptarë dhe shqiptare si dhe ata nga diaspora të shprehin interesin e tyre pranë Institucionit të Presidentit të Republikës.

Kandidaturat duhet të plotësojnë kushtet dhe kriteret e përcaktuara në Ligjin nr. 8269, datë 23.12.1997 “Për Bankën e Shqipërisë”, i ndryshuar. Me këtë rast, Institucioni i Presidentit të Republikës garanton çdo të interesuar se aplikimi i tij ose i saj do të mbetet konfidencial. Çdo i interesuar mund të aplikojë dhe kontaktojë në adresën [email protected]. Shprehja e interesit nga çdo i interesuar duhet të shoqërohet me dokumentacion të skanuar në përputhje me Ligjin Nr. 8269, dt. 23.12.1997 “Për Bankën e Shqipërisë”, i ndryshuar. Aplikimet për shprehjen e interesit për detyrën e Guvernatorit të Bankës së Shqipërisë, në adresën e-mail të sipërpërmendur, do të vijojnë deri më datë 5 tetor 2014”,- thuhet në komunikatën e presidentit.

Kësisoj sipas kësaj, afati i fundit për të aplikuar është data 5 tetor, pesë ditë pasi mbyllen edhe aplikimet për anëtarët e Këshillit Mbikëqyrës. Veç kësaj, kjo nismë e Nishanit del disi kundër qëndrimit të kreut të qeverisë, Edi Rama përsa i përket shtetësisë së guvernatorit të ri. Presidenti nëpërmjet kësaj komunikate ka hedhur poshtë mundësinë që të emërohet një shtetas i huaj në krye të institucionet më të madh monetar në vend.

Shkrimi u botua në Shqiptarja.com (print) në 20 Shtator 2014

Redaksia Online
(d.a/shqiptarja.com)