Hapja e listave/ Varhelyi: Ndryshimi i sistemit s'mund të miratohet më pak se një vit para zgjedhjeve! Rama: Me këtë logjikë s'votohet as drafti i 5 qershorit

Komisioneri për Zgjerimin në BE Olivér Várhelyi kërkon që të miratohet sa më shpejt drafti konsensual i 5 qershorit për reformën zgjedhore, ndërsa sa i përket ndryshimeve kushtetuese për sistemin, ai kërkon që të mos ndryshohen një vit para zgjedhjeve.

“Është e rëndësishme që reforma e dakordësuar me 5 qershor të adoptohet nga Parlamenti sa më shpejt në sesionin aktual, me qëllim që të mundësojë zbatimin e ndryshimeve të reja përpara zgjedhjeve të përgjithshme të vitit të ardhshëm.

Bazuar mbi rekomandimet e OSBE/ODIHR ajo adreson një nga rekomandimet kyçe për nisjen e negociatave të anëtarësimit. Reforma të tjera që lidhen me sistemin zgjedhor, jashtë rekomandimeve të OSBE/ODIHR duhet të miratohen jo më pak se një vit para zgjedhjeve dhe për to nevojiten konsultimet e duhura, siç rekomandon OSBE”-shkruan Varhelyi në reagimin e tij.

Por Edi Rama kishte një përgjigje për këtë. Duke iu përgjigjur Olivér Várhelyi, Rama tha se me këtë logjikë i bie të mos votohet as ndryshimi në Kod, referuar draftit të 5 qershorit se është një vit para zgjedhjeve. "Jemi një vit, kemi edhe një sezon tjetër politik. Nëse flasim me këtë logjikë i bie që mos votojmë asgjë. këtu hyn qoftë kushtetuta qoftë kodi. Mirëkuptoj shqetësimin, adresimi i shqetësimit është korrekt nga ana e të gjithë miqve.

Po kaq korrektë është edhe përgjigja e PS, marrëveshja e 5 qershorit nuk preket. nëse ne miratojmë kodin dhe do dalë një pikë, një kërkesë për të cilën kemi rënë dakord që mungon apo është tjetërsuar, atëherë le të na e thonë. Nuk mund të ndalohet Kuvendi, PS apo deputetët që të shkojnë përtej asaj kornize dhe për cfarë? Jo për të bërë Ramën mbret, por për ti dhënë qytetarëve më shumë pushtet në zgjedhje" tha ai.

TAG:
• edi rama
• reforma zgjedhore
• Oliver Varhelyin