Haradinaj: Qeveria Kurti do të jetë zhgënjim, Kosova nuk është e ftuar për takimin e rradhës të Mini-Shengenit

Kryeministri në detyrë, Ramush Haradinaj, ka kritikuar vonimin e krijimit të qeverisë së re në një konferencë për media pas mbledhjes së qeverisë.

Ai tha se tani e gjithë barra bie mbi fituesin e zgjedhjeve, Albin Kurtin, për ngecjen e institucioneve dhe zhvillimit të vendit.

“Është mirë që të kryhet misioni i vendit dhe tani barra bie mbi fituesin, nuk e kam për të shfajësuar palën tjetër, por kjo bie mbi palën për krijimin e institucioneve. Vonesa nga fituesi menjëherë është minus për ata sepse kanë premtuar që do ta ndërprenë zhvatjen. E kam thënë se kam dyshim në aftësitë menaxheriale të Albin Kurtit dhe do të ketë zhgënjim nga kjo qeveri dhe këtë nuk e them në bazë të interesave personale. Duke i njohur edhe rrethanat e këtij koalicioni nuk do të jetë në gjendje të mbrojë interesat e qytetarëve. Qeveria që vjen do të jetë e shumë e dobët fatkeqësisht sepse  parametrat që janë vendosur për të ecur përpara janë keq”.

Sa i përket votimit të presidentit në Kuvend Haradinaj tha se për këtë vendos partia kur të vijë koha.

Haradinaj tha ghithashtu se nuk kanë marrë asnjë ftesë nga Vetëvendosja apo LDK-ja.

"Nuk refuzojmë diskutimin me askënd në Kosovë. Kur kam krijuar qeverinë kam biseduar edhe me Listën Serbe që tani edhe Albini duket se e ka kuptuar këtë gjë”.

Haradinaj tha se Kosova nuk është e ftuar për takimin e rradhës të Mini-Shengenit.

“Unë nuk marr pjesë në takimin e Mini-Shengen. Nuk kemi marrë ftesë”.

TAG:
• Albin Kurti
• Ramush Haradinaj
• lista serbe
• vetevendosja
• AAK
• LDK
• Minishengeni