Historia e parlamentarizmit
mbledh zonjat diplomate

TIRANE- Historia e Parlamentarizmit është bërë pjesë e axhendës së aktivitetit të klubit diplomatik "Mirëserdhe në Shqipëri” që u zhvillua në ambientet e Kryesisë së Kuvendit.

Në takim ishin të ftuar zonja diplomate, bashkëshorte të ambasadorëve të akredituar në Tiranë, ish-deputete të Kuvendit të Shqipërisë, zonja Liri Berisha dhe bashkëshortja e OSBE-së Ana Maria Wollfarth.

Pritja u organizua nga kryeparlamentarja, Jozefina Topalli në një nga sallat e kryesisë së Kuvendit. Në një ambient të veçantë u ekspozuan edhe punime artizanale të bëra me dorë nga gratë shqiptare, kostume tradicionale nga të gjitha trevat në kohë të ndryshme, si dhe piktura me pamjen e qyteteve të vjetra shqiptare të shekullit të kaluar.

Nga ana e saj Kryetarja Topalli bëri një prezantim të shkurtër të historikut të parlamentarizmit shqiptar qysh me fillimin e tij në vitin 1912, 100 vite më parë, për të vijuar më pas me Këshillin Kombëtar të Lushnjës, Kuvendin Kushtetues, afirmimin e Shqipërisë si Republikë Parlamentare, periudha e mbretërisë shqiptare, periudha e errët e komunizmit e Kuvendit Popullor, dhe më pas rilindja e Parlamentit në vitin 1991.

"Pavarësisht nga vështirësitë dhe sfidat që Parlamenti ka kaluar gjatë kësaj periudhe, unë jam shumë e kënaqur, pasi po të shohim pak më prapa, ku kemi qenë dhe ku jemi, secila prej nesh duhet të jetë jashtëzakonisht krenare se sa shumë ky vend ka ndryshuar, se sa larg ky vend ka shkuar në një kohë relativisht të shkurtër" u shpreh Topalli. Më pas ajo i njohu zonjat e nderuara me projektin për godinën e Parlamentit të ri.
(sg/shqiptarja.com)

TAG:
• OSBE