Humbja historike e PD më 6 mars, Rudina Hajdari: Forca e themeluar nga babi im dhe që solli demokracinë u katandis në një parti të vogël

"Nuk kam fjalë për ta përshkruar ndjesinë e tmerrshme".

Ky është qëndrimi i Rudina Hajdarit, ish-deputete e Partisë Demokratike, vajzës së 'Heroit të Demokracisë' Azem Hajdari, themelues i kësaj force politike, për rezultatin më shumë se dramatik të forcës më të madhe opozitare në vend në zgjedhjet e së dielës së kaluar në 6 bashki të vendit.

Përmes një postimi në Facebook, Hajdari thotë se partia e themeluar nga babai i saj dhe qindra studentë guximtarë, u katandis nga forca që solli lirinë dhe demokracinë në një parti të vogël e pa mbështetje elektorale.

"Nuk kam fjalë për ta përshkruar ndjesinë e tmerrshme që pata dje kur pashë se Partia e themeluar nga im atë dhe qindra studentë guximtarë, të cilët luftuan me rregjimin komunist për të instaluar demokracinë në Shqipëri, u katandis nga forca që solli lirinë dhe demokracinë në një parti të vogël e pa mbështetje elektorale. Si ish deputete e PD kjo më dhemb, e si bija e Azem Hajdarit kjo më tmerron. PD nuk është prona as e Lulzim Bashës e as e Sali Berishës, të cilën ata mund ta shpenzojnë, shpërdorojnë, shkatërrojnë sipas interesit të tyre personal. PD është themeli i demokracisë shqiptare. Themel i larë me gjakun e njerëzve që dhanë jetën për të e me djersën e ballit të qindra mijëra qytetarëve të cilët besuan dhe luftuan për një Shqipëri ku jetohet me dinjitet e në liri. Ndaj dua sot ti bëj thirrje si Bashës dhe Berishës që ti japin fund absurdit dhe shkatërrimit të PD, të bëjnë të dy pas dhe ti hapin rrugës një gare e cila do të mundësojë ardhjen në PD të një lidershipi të ri, me vizion, me pasion, me energji dhe pa ngarkesa nga e kaluara",  shkruan Hajdari.

Ajo i bën një thirrje gjithë demokratëve që të mos heshtin më, 'të mos përulen më para atyre që po shkatërrojnë Partinë Demokratike por të bashkohen për të kërkuar një drejtim të ri'

"PD ka qenë partia që i ka bërë shqiptarët të ëndërrojnë për Europën, për një të ardhme të ndritur e plot begati. PD ka mundësi sërish ta kryejë këtë mision, por kjo nuk arrihet as me Bashën e as me Berishën. Nëse ata vazhdojnë betejën e tyre për plaçkë e interesa të vogla, nga PD do mbetet veç disa faqe në historinë e Shqipërisë. Ata nuk frymëzojnë më askënd, rezultatet e djeshme e tregojnë qartë këtë. Çdo demokrat, çdo militant, çdo zyrtar, çdo deputet i PD që nuk ka hyrë aty për plaçkë por për ideal e pasion duhet sot të ngrejë krye e të shpëtojë PD nga shkatërrimi e zhdukja.  SOT! Nesër do të jetë vonë", përfundon postimi në Facebook i ish-deputetes Rudina Hajdari.

Ky reagim i Hajdarit vjen pasi në zgjedhjet e pjesshme vendore të 6 marsit, Partia Demokratike pësoi disfatën më të madhe në historinë e saj që prej themelimit. Përveçse nuk fitoi në asnjë prej bashkive, në 5 prej tyre doli forcë e tretë politike pasi u mund edhe nga koalicioni i Berishës dhe Metës. Ky rezultat dramatik ka shkaktuar një furtunë reagimesh në Partinë Demokratike, me deputetë të saj që kanë kërkuar largimin e menjëhershëm të Bashës si hapi i parë drejt shpëtimit të kësaj force politike.

K.T./r.k./Shqiptarja.com

TAG:
• Rudina Hajdari
• Lufta brenda PD
• lulzim basha
• PD
• zgjedhjet 6 mars 2022