Ferdinand Shehu, ish-drejtor i ALUIZNI-t në Tiranë, përmes një padie ka çuar në Gjykatë, Drejtorinë e Përgjithshme të Parandalimit dhe Pastrimit të Parave, pasi sipas tij i kanë kushtuar një dëm të madh ekonomik.

Në padinë e depozituar në gjykatën Administrative, theksohet se kjo drejtori i ka sekuestruar Shehut në vitin 2019 një llogari bankare afro 1.5 milionë euro, që më pas ia ka kthyer Gjykata pasi kanë rezultuar para që nuk kanë qenë produkt i aktiviteteve të dyshimta dhe kanë qenë të ligjshme. Ish-drejtori i ALUIZINI-t pretendon nga Drejtoria e Pastrimit të parave që t’i paguaj të gjitha kamatvonesat, për shkak se paratë do t’i investonte në bursë, dhe pretendon fitimin e munguar.

Më tej Shehu thotë se në momentin kur i është vendosur sekuestrimi i llogarive bankare, të cilën pretendon se e ka nga shitja e një hoteli , ai ka qenë ne një udhëtim jashtë vendit me familjen dhe i janë bllokuar të gjitha kartat.

Shehu arsyeton se bllokimi i kartave i kishte shkaktuar një udhëtim me shumë rreziqe familjes Shehu, për të cilat tashmë kërkon dhe dëmshpërblim.

”Paditësi Ferdinand Shehu së bashku me familjen në datë 01.08.2019 ka qenë jashtë shtetit me pushime. Paditësi ka pretenduar se ka provuar që të përdorë kartën e kreditit dhe ka konstatuar se kjo kartë ishte e bllokuar. Ai ka deklaruar se detyrimi për të kryer pagesa ndaj njësive akomoduese të prenotuara dhe për t’u kthyer në Shqipëri e detyruan të ndërmarrë me familjen një udhëtim me shumë rreziqe”, thuhet ndër të tjera në padi.