I dënuari për trafik droge e
armësh kërkon dëmshpërblim

TIRANE - Pesë vite pasi u arrestua për trafik armësh dhe lëndë narkotike, pasi u ekstradua dhe u përball me të gjitha shkallët e gjyqësorit derisa ja doli mbante të dilte nga qelia e burgut, kërkon kompensim për burgim të padrejtë. Edison Begaj, i cili u shpall në kërkim ndërkombëtar në 20 shkurt të vitit 2008 pas operacionit policor të koduar “Qiriu i ndezur”, i është drejtuar me një kërkesë Gjykatës së Tiranës.

Çështja që mban numrin 9839 u dorëzua në këtë gjykatë, dhe do të gjykohet nga gjyqtari Altin Shkurti. Në rolin e të paditurit është Dega e Thesarit pranë Ministrisë së Financave, e cila në rast të pranimit të kërkesës së Begajt, do të paguajë afro 3 milion lekë të reja.

ARRESTIMI

Më 20 shkurt të vitit 2008, policia e Vlorës përfundoi operacionin e koduar “Qiriu i ndezur”, i cili i dha fund veprimtarisë 10-vjeçare kriminale të një bande e cila trafikonte drejt Italisë drogë dhe armë. Aksioni i shtrirë në Vlorë, Fier, Kavajë dhe Lushnje çoi në pranga shtatë persona, mes tyre edhe Edison Begajn, banues në Vlorë.

Ndërhyrja e dhjetëra punonjësve policorë të Vlorës dhe të Forcave të Ndërhyrjes së Shpejtë çoi në bllokimin dhe sekuestrimin e 284 kilogramëve hashash të ndara në tetë pako të mëdha, në fshatin Ndërmenas të Fierit.

Droga u gjet në një furgon, në të cilin gjatë kontrollit u zbuluan 5 armë zjarri automatike, një pistoletë, dhe një sasi e konsiderueshme fishekësh dhe granatash. Në atë kohë, policia tha se armët e sekuestruara ishin destinuar për grupet kriminale italiane.

VENDIMET E GJYQËSORIT

Gjykata e Shkallës së parë Vlorë dha masën e sigurisë “arrest me burg” për Begajn, masë e cila u shua nga Gjykata e Apelit për Krimet e Rënda në Tiranë. Por edhe pas shuarjes së masës së sigurimit ndaj të akuzuarit, Prokuroria e Krimeve të Rënda rikërkoi masën “arrest me burg” ndaj Begajt dhe Gjykata e Krimeve të Rënda në kryeqytet e pranoi kërkesën e organit të akuzës.

Disa prej të akuzuarve u arratisën nga Shqipëria, mes tyre edhe Edison Begaj, i cili u arrestua më 25 mars të vitit 2009 në Itali dhe u ekstradua për llogari të drejtësisë shqiptare, më 30 tetor 2009. Me nisjen e procesit gjyqësor në ngarkim të tij, akuza paraqiti gjatë shqyrtimit gjyqësor përgjime dhe prova që fajësonin Begajn.

Me vendimin e datës 18 tetor 2010, Gjykata e për Krimet e Rënda e dënoi Edison Begajn me 7 vjet e 6 muaj burgim. Afro dy vite më vonë, më 5 korrik 2012, Kolegji Penal i Gjykatës së Lartë vendosi pushimin e gjykimit për Edison Begajn, i akuzuar për trafik ndërkombëtar armësh dhe municionesh dhe trafik ndërkombëtar droge. Shtatë muaj më vonë, Begaj kërkoi kompensim për burgim të padrejtë.

Shkrimi u buotua sot në gazetën Shqiptarja.com (print) 20.03.2013

Redaksia Online
(b.m/shqiptarja.com)