Gjatë takimit Ministri Bushati informoi kryeparlamentarin japonez mbi rëndësinë që Qeveria që përfaqëson i kushton marrëdhënieve me Japoninë dhe ka shprehur gatishmërinë për bashkëpunim të mëtejshëm mes dy vendeve. Gjithashtu Ministri Bushati falënderoi z. Ibuki për kontributin e vazhdueshëm të dhënë nga Japonia nëpërmjet programeve të Agjencisë Japoneze të Bashkëpunimit Ndërkombëtar (JICA) në Shqipëri.
Bunmei Ibuki, nga ana e tij, pasi vlerësoi stabilitetin politik në Shqipëri si një faktor i rëndësishëm sigurie për stabilitetin dhe zhvillimet në rajon, konfirmoi gatishmërinë e palës japoneze për të thelluar bashkëpunimin ndërmjet dy vendeve. Dhe është pikërisht stabiliteti politik në vendin tonë, sipas z. Ibuki, faktor i cili më së shumti i hap udhën një pranie më të rëndësishme edhe të biznesit japonez në Shqipëri. Gjithashtu, Kreu i Dhomës së Përfaqësuesve të Japonisë, shprehu gatishmërinë për të mbështetur Shqipërinë në organizatat financiare ndërkombëtare, si dhe për projekte të reja të rëndësishme për konsolidimin e ekonomisë shqiptare.