Imuniteti, Wollfarth: Kushtetuta
nuk mund të ndryshohet çdo ditë

TIRANE- Ambasadori i OSBE-së Eugen Wollfarth shprehet optimist për gjetjen e një zgjidhjeje për heqjen e imunitetit mes dy forcave politike, por shton se nuk është dakord me ndryshimin e Kushtetutës. Ky është propozimi që kryeministri Berisha ka hedhur në tavolinë, ndërkohë që dje kreu i PS-se tha se opozita ishte gati të votonte heqjen e imunitetit si pjesë e reformës për drejtësi.

“Jam i sigurt që bashkërisht mund të gjendet një zgjidhje e mirë në parlament. Kushtetuta nuk duhet prekur çdo ditë”- ka thënë ambasadori Wollfarth në një prononcim për median menjëherë pas aktivitetit të zhvilluar dje pasdite në Universitetin privat Bedër, ku mbajti dhe një fjalim në lidhje me rolin e medias.

Ambasadori vlesësoi qëndrimin që kreu i PS-së mbajti dje në lidhje me votimin për heqjen e imunitetit si pjesë e reformës në drejtësi, një deklaratë që shkon në sinkron me atë të kryeministrit dhe Kryetares së Kuvendit. Wollfarth tha se ishte një kontribut i rëndësishëm dhe se tani duhej një zgjidhje dhe votim i shpejtë.

“Ky është një kontribut i rëndësishëm në një diskutim jashtëzakonisht të rëndësishëm. Imuniteti duhet të përdoret vetëm për t'u shërbyer njerëzve dhe për asgjë tjetër; dhe duhet të ketë kufij. Unë jam në favor të një zgjidhjeje dhe votimi të shpejtë”.

Përfaqësuesi i OSBE përsëriti se mbetet ende shumë për të bërë që Shqipëria të arrijë të marrë statusin e vendit kandidat.  “Procesi i reformave duhet të vazhdojë – reforma zgjedhore, parlamentare dhe reforma në drejtësi. Unë sigurisht që uroj të ketë një rekomandim pozitiv, por në fund vendimi i takon Komisionit, i cili ia paraqet rekomandimin e tij shteteve anëtare të BE-së”
(sg/shqiptarja.com)

TAG:
• OSBE