India thyen sërish një rekord negativ, 3.689 viktima nga COVID-19 në 24 orët e fundit, situata kritike

INDI- India thyen sërish një tjetër rekord sa i përket COVID-19, duke shënuar 3.689 humbje jete, numri më i lartë i viktimave që nga fillimi i pandemisë për 24 orë. Spitalet janë në kaos, pacientë humbin përditë jetën nga mungesa e oksigjenit dhe krematoriumet janë të mbingarkuara, kjo është situata që India po përballet përditë në “luftën” e vështirë me COVID-19.

Imazhet e familjarëve që luten të në dyert e spitaleve për të shpëtuar të afërmit e tyre janë drithëruese.

Vende nga e gjithë bota po bashkojnë forcën dhe po solidarizohen për të ndihmuar Indinë në këtë moment të vështirë duke furnizuar me bombola oksigjeni, maska, teste të shpejta dhe ilaçe.

Pyetja që lind teksa sytë e të gjithë botës janë nga India është, pse qeveria nuk vendosë një bllokim total?

Qeveria vijon të hezitojë për shkak të “goditjes” fatale ekonomike që mund të shkaktojë bllokimi total.

Për shkak se situata epidemiologjike sa vjen edhe përkeqësohet, vende të ndryshme kanë filluar të forcojnë masat anti-COVID për qytetarët të cilët udhëtojnë nga India.

Qytetarët australianë që kthehen në shtëpi nga India mund të përballen me 5 vjet burg ose me gjoba të rënda pasi qeveria e ka bërë udhëtimin përkohësisht të paligjshëm.

SHBA do të kufizojnë udhëtimet hyrëse nga India duke filluar të martën për shkak të rritjes së rasteve dhe varianteve të COVID-19.

India zë vendin e dytë në "listën e zezë" të numrit të lartë të infektimeve dhe viktimave nga COVID-19.

J.GJ./Shqiptarja.com

TAG:
• Indi
• Koronavirus
• masat anticovid
• Viktimat Covid