TIRANE- Stina e verës është edhe periudha kur infeksionet në lëkurë kapin numrin më të lartë të pacientëve. Kjo për vetë faktin e frekuentimit të plazheve dhe pishinave, ku në disa raste uji i detit është i ndotur, apo kur uji i pishinave sasinë e klorit nuk e ka brenda parametrave të përcaktuara.
 
Problemet
Dhjetëra raste pacientësh me infeksione të lëkurës, paraqiten çdo ditë në pavijonin dermatologjik në QSUT. Mjekët pohojnë se frekuentimi i plazheve, por me së shumti i pishinave është shkaku kryesor i rritjes të numrit. Kjo për shkak se një pjesë e pishinave nuk zbatojnë as rregullat minimale të higjienës, për të qarkulluar ujin çdo katër orë apo për të hedhur sasinë e duhur të klorit.