Infermieri 'martohet' me vogëlushen
me kancer, i bën ëndrrën realitet

Në qendrën shëndetësore Melodies në New York ka ndodhur ngjarja më e bukur dhe prekëse po ashtu.

4-vjeçarja Abby që vuante nga një formë e rëndë e leuçemisë po mjekohej në këtë klinikë. Ndërsa trajtohej, njohu një infermier të quajtur Matt Hickling dhe vogëlushja filloi ta pëlqente 'më shumë sesa thjesht shok' dhe i tha nënës së saj që së shpejti do të martohej me të.

Mamaja e vajzës, duke menduar se deklarata e vazjës ishte shumë e pafajshme dhe e këndshme, ia bëri të ditur nëpërmjet një mesazhi infermierit Matt 'ndjenjat' që vajza e saj ushqente ndaj tij. Disa minuta më pas Matt i përgjigjet: "Do të organizojmë një dasmë nesër".

24 orë më vonë 'dhëndri' së bashku me stafin e klinikës, organizuan një dasmë të përshtatshme për Abby. "Pacientja jonë me propozoi për martesë,- postoi Matt në Facebook,- Nuk hezitova dhe thashë PO".

Matt veshi një bluzë ku ishte stampuar një kostum ndërsa vogëlushja Abby veshi një fustan priceshe dhe u shoqërua drejt altarit nga shoqërueset e nuses, infermieret Angie dhe Courtney.

Një doktor i spitalit mbajti fjalimin në ceremoni, gjatë të cilit çifti shkëmbeu unazat me lëpirëse. Pas dasmës çifti iu drejtua makinës ku lexonte 'të sapomartuar' , të cilën e ngiste nusja, ndërsa dhëndri e shtynte drejt dhomës ku po kurohej që të shijonin tortë dhe të bënin fotografi.

Vogëlushja tashmë një nuse u shpreh: "Kjo është dita më e bukur e jetës time".




Redaksia Online
(m.p/shqiptarja.com)