Interpol godet trafikun ndërkombëtar të armëve, 152 të arrestuar dhe mbi 2800 armë të sekuestruara! Zbulohen granata të trafikuara nga Bosnja në Serbi

Një operacion ndërkombëtar i koordinuar nga Interpol në 17 vende të Europës dhe Azisë Qendrore ka çuar në sekuestrimin e mbi 2800 armëve të zjarrit, qindra granatave dhe dhjetëra mijëra municioneve. Gjatë operacionit janë arrestuar më shumë se 152 persona, ndërsa hetimet kanë zbuluar lidhje mes trafikut të armëve, krimit të organizuar dhe konflikteve të armatosura në Europën Lindore, Ballkan dhe Nagorno-Karabak.

Operacioni i koduar “Trigger X” u zhvillua nga 22 qershori deri më 5 korrik, me synimin për të goditur rrjetet e trafikut të paligjshëm të armëve të zjarrit.

Sipas Interpol, autoritetet sekuestruan 2823 armë të vogla dhe të lehta, afro 400 granata dhe mjete shpërthyese, si dhe më shumë se 40 mijë fishekë.

Mbi 152 persona u arrestuan për vepra penale që lidhen me mbajtjen dhe trafikimin e armëve, por edhe me trafikun e drogës, kontrabandimin e emigrantëve dhe grabitjet.

Mes të arrestuarve janë edhe 15 persona ndaj të cilëve Interpol kishte lëshuar njoftime ndërkombëtare, përfshirë pesë të arratisur që kërkoheshin me njoftim të kuq.

Armë nga zonat e luftës, granata të trafikuara nga Bosnja në Serbi

Një pjesë e konsiderueshme e armëve të sekuestruara dyshohet se kanë lidhje me konfliktet e armatosura në Europën Lindore dhe Azinë Qendrore.

Në pikën kufitare mes Bullgarisë dhe Turqisë, autoritetet zbuluan dy kamionë të rëndë që transportonin mbi 1000 pushkë gjuetie të tipit ushtarak.

Ndërkohë, gjatë operacionit u sekuestruan gjithsej 268 granata. Sasia më e madhe në një sekuestrim të vetëm u zbulua në Serbi, ku autoritetet gjetën 68 granata të trafikuara ilegalisht nga Bosnja.

Po në Serbi, policia zbuloi një punishte të paligjshme ku armët me ajër dhe armët me ndezje me goditje përshtateshin për t'u shndërruar në armë zjarri funksionale.

“Operacioni Trigger X nxori në pah rrezikun e lartë që armët e përdorura në konfliktet e armatosura të përfundojnë në duart e rrjeteve të krimit të organizuar, ku përdoren për kryerjen e veprave të tjera penale”, deklaroi Harald Arm, drejtor ekzekutiv për kapacitetet policore në Interpol.

“Këto sekuestrime tregojnë rëndësinë e veprimit të koordinuar ndërkombëtar për të identifikuar rrugët e trafikut, për të çmontuar rrjetet kriminale dhe për të parandaluar kalimin e paligjshëm të armëve të zjarrit te personat që synojnë t'i përdorin për qëllime kriminale”, shtoi ai.

Zbulohen 20 gomone të lidhura me kontrabandën e emigrantëve

Operacioni zbuloi edhe lidhje mes trafikut të armëve dhe rrjeteve që merren me kontrabandimin e emigrantëve.

Në Bullgari, autoritetet sekuestruan 20 gomone që po transportoheshin drejt një vendi të Europës Perëndimore.

Sipas Interpol, informacionet e inteligjencës tregojnë se ngarkesa ishte e lidhur me rrjete kriminale të përfshira në kontrabandimin e emigrantëve dhe se gomonet do të përdoreshin për kalime të paligjshme të Kanalit të La Manshit.

Gjatë kontrolleve u identifikuan edhe emigrantë të parregullt, njëri prej të cilëve mbante një armë automatike dhe disa fishekë.

Përveç armëve dhe mjeteve shpërthyese, autoritetet sekuestruan lëndë narkotike, përfshirë kokainë dhe kanabis, cigare të falsifikuara, si dhe tekstile dhe produkte ushqimore të padeklaruara.

Sipas Interpol, rezultatet e operacionit tregojnë se trafiku i paligjshëm i armëve mbetet një kërcënim serioz për sigurinë ndërkombëtare, veçanërisht për shkak të rrezikut që armatimet nga zonat e konflikteve të përfundojnë në duart e organizatave kriminale.

 

U.D/Shqiptarja.com

TAG:
• arme zjarri
• interpol
• trafik armesh