Intervista e plotë/ Hysi: Nuk synoj post ministror! U respektua 5 qershori me ndryshimet në Kodin Zgjedhor

Presidenti i Republikës zoti Ilir Meta tha se do të publikojë të gjithë emrat tuaj, sigurisht jo për mirë, që votuat këto ndryshime. A jeni penduar në ndonjë moment për atë që bëtë apo votuat me bindje të plotë se kështu duhet shkuar drejt zgjedhjeve të vitit 2021?

Ndryshimet që janë bërë sot në Kodin Zgjedhor lidhen me ndryshimet kushtetuese. Pra, përderisa Kuvendi i Shqipërisë bëri ndryshime në Kushtetutën e Republikës së Shqipërisë lidhur me hapjen e listave, padyshim që ky ndryshim kushtetues do të reflektonte në Kodin Zgjedhor. Pra, është detyrim ligjor i parlamentit që ligjet të jenë në përputhje me Kushtetutën. Lidhur me përmbajtjen e ndryshimeve, a duhet të jenë këto ato që ne presim, padyshim që ne e kemi thënë, edhe vetë kryeministri Rama e ka thënë, të gjithë e themi, por edhe unë e theksoj që këto nuk janë ato ndryshime dhe modeli më i mirë që duhet. Po e nis që me marrëveshjen e 5 qershorit sepse reforma zgjedhore, anëtare e së cilës kam qenë edhe unë, ka pasur si objektiv ose objekt të punës së vet reflektimin e rekomandimeve të OSBE-ODIHR-it. Dhe rekomandimet e OSBE-ODIHR-it adresojnë çështje, të cilat janë shumë të rëndësishme për zgjedhjet, duke filluar që nga depolitizimi i administratës, duke filluar nga KQZ-ja te niveli i qendrës së votimit dh një sërë probematikash që lidhen me financimin e partive politike, me fushatat, e me radhë. Mua më vjen keq, e kam theksuar në çdo studio, e kam theksuar publikisht në rrjetet sociale, po e theksoj edhe këtu, që ne nuk arritëm të kemi një administratë zgjedhore të depolitizuar. Dhe pikërisht për këtë më vjen keq. Pra kam votuar një element të reformës zgjedhore, për të cilën unë por edhe e gjithë partia ku unë aderoj, kemi qenë kundër. Por për hir të kompromiseve sepse në politikë bëhen kompromise dhe meqenëse kjo ka ardhur si kërkesë nga opozita jashtëparlamentare, ne e votuam atë. Por ky nuk është modeli më i mirë. E dyta, hapja e listave 100% është një kërkesë që e ka kërkuar publiku.

Por jo kështu...

Ne në parlament, kur bëmë ndryshimet kushtetuese, thamë jo më pak se 2/3. Pra, çdo parti politike ka të drejtën që listën ta hapë 100%. Këtë bëri PS-ja, sepse kjo ishte një kërkesë edhe nga opozita parlamentare dhe ne e hapëm listën 100%, ku nga i pari i listës deri tek i fundit, në çdo zonë zgjedhore, votimi është me votën parapëlqyese të zgjedhësit. Padyshim ne garojmë jo si individë, sepse po të jetë se garojmë si individë dalim si kandidatë të pavarur. Ne garojmë nën siglën e një partie dhe për rrjedhojë, çdo parti që garon, çdo subjekt zgjedhor, do të zgjedhë ekipin që do ta përfaqësojë në Kuvendin e Shqipërisë. Pra, nuk mund t’i lihet votimeve, se po të jetë për t’ia lënë totalisht 100% zgjedhësve, mbledhim 3 000 firma dhe garojmë si kandidatë të pavarur.

Ç’rëndësi ka, ata do populli.

Jo, populli do një qeverisje të mirë dhe qeverisjen e mirë e bëjnë partitë, nuk e bëjnë individët. Ky është problem sa ligjor, kushtetues, por nuk mund të biem në populizëm. Pra, kur qeveria vjen të marrë një mandat të tretë, vjen me një program. Programi ka një ekip nga pas që e mbështet. Dhe midis këtij ekipi që e jep kryetari, siç thatë ju, se kush do të jetë në atë listën fituese e përcakton vota parapëlqyese.

Zonja Hysi, e dini që me këtë lloj votimi dhe me këtë lloj mënyre, duke votuar partinë dhe jo vetëm individin, në fakt në vitin 2013 por edhe në mandatin e dytë, dekriminalizimi ju ka kapur një pjesë të madhe të deputetëve. Pjesa më e madhe e atyre që janë skarcuar kanë qenë nga forca juaj politike. Mund të ishte kështu në qoftë se listat do të ishin 100% të hapura?

Po. Rreziku i listës 100% të hapur, pa pasur një vlerësim brendapërbrenda partisë, e ka këtë risk. Ky nuk është modeli më i mirë, por është, sikurse e thamë, ne ishim gati për një Kod Zgjedhor të ri, ju e dini dhe projekti i një Kodi të ri Zgjedhor ishte në tryezë, por u shty meqenëse opozita, LSI-ja, PD-ja dhe partitë e tjera nuk e kërkuan, nuk prauan të kishim administratën zgjedhore të depolitizuar, por e lanë për zgjedhjet e vitit 2025. Për rrjedhojë, nuk ia vlente të kishim Kodin e ri Zgjedhor me rregulla që rregullonin një administratë që vijon të jetë e politizuar. Por ne sot kemi edhe një paketë tjetër ligjesh që do të diskutohet në parlament. Flas për integritetin. E para, asnjë lider partie nuk mund të shkojë në zgjedhjet e 25 prillit me një listë kandidatësh, të cilët mund të kenë cene. Nuk diskutohet kjo që thoni ju, integriteti dhe rekordet.

Duhet t’ia njihni këtë meritë PD-së se dekriminalizimi është nismë që e kanë prezantuar ata.

Padyshim, edhe në këtë studio e kemi theksuar, unë personalisht, që miratimi i atij ligji ka meritë. Por mos harroni, që po t’i hyjmë atij ligji nga pikëpamja pastaj e kushtetutshmërisë dhe e konventave, ka probleme të tjera.

Ç’rëndësi ka, rezultati final është që kriminelët nuk janë më në parlament.

Në logjikën tuaj për të parë rezultatin final, mund të fusim edhe dënimin me vdekje, që të zhdukim kriminelët dhe të mos ketë punë gjykata. Jo, nuk është kjo zgjidhja.

Mund ta fusni por s’jua lejon Amerika dhe BE-ja, se edhe këtë mund ta bënit.

Ne jemi një vend i BE-së, kemi standardet tona, jemi vend i KE-së, kemi një konventë. Qëllimi objektiv realizohet me mjete të ligjshme, nuk mund ta realizosh me mjete të cilat bien ndesh me standardet. Por, meqenësse ne kemi pasur shqetësim, prandaj ne bashkuam votat me opozitën, nëse juve ju kujtohet, për të kaluar ligjin për verifikimin e integritetit të figurave. Se po t’i hysh pastaj parashkrimit e faktit që një njeri që mund të gabojë edhe rehabilitohet etj., etj., kjo është një histori tjetër, po të flasim si juristë profesionistë. Megjithatë, unë mendoj që çdo parti në datën 25 prill do të garojë me listën më të mirë sepse ndryshe nuk merr dot votën. Pra, do të votohet si parti, do të votohen edhe individët.

Zonja Hysi, përmendët pak raportin e OSBE-ODIHR-it dhe marrëdhëniet që keni pasur si forca politike me të. Pse në fund nuk e pranuat kërkesën me ngulm të PD-së dhe të LSI-së që të merrnit edhe mendimin e OSBE-ODIHR-it? Apo kishit frikë se ndoshta përfundimi mund të mos ishte në favorin tuaj?

Jo, kjo nuk është e saktë sepse e para, mbi të gjitha, ne kemi zbatuar një marrëveshje që është marrëveshja e 5 qershorit, që është një marrëveshje politike.

Marrëveshja e 5 qershorit është shkelur.

Jo, e keni gabim. Marrëvehja e 5 qershorit është një marrëveshje politike. Në Shqipëri, në një vend të demokracisë parlamentare, vendimet i marrin institucionet. Pra, partitë që braktisën zgjedhësit, braktisën parlamentin, nuk kanë të drejtë morale që të kërkojnë sepse vendin e kishin në parlament dhe mund ta bënin shumë mirë përfaqësimin dhe misionin e tyre. Megjithatë, për hir të krijimit të hapësirës që opozita jashtëparlamentare të futet në rrugën e funksionimit të demokracisë.

Se e kërkuan ndërkombëtarët.

Jo, në radhë të parë, shumë nga këto konsensuse po të mos donte PS-ja nuk bëheshin.

I keni lexuar reagimet e ambasadës amerikane dhe britanike për atë çfarë ndodhi sot?

Jo, nuk i kam lexuar sepse po vij drejt e nga puna, por ma thoni ju.

Thonë që “na vjen keq që nuk pati konsensus”.

Të bëjmë dallimin, se thatë marrëveshja. Marrëveshja e 5 qershorit u mbyll dhe ne kemi miratuar ndryshimet në Kodin Zgjedhor, megjithëse, po ta them që unë personalisht dhe shumë kolegë të mi, për një pjesë prej tyre nuk kemi qenë dakord. Dhe e kam dhënë votën për hir të kësaj marrëveshjeje. Po të isha në pozita të tjera, nuk kisha për t’i votuar sepse kam thënë dhe kam luftuar për depolitizim të administratës, kam luftuar për respektim të institucioneve dhe shumë e shumë elementë të tjerë. Ajo që kemi bërë sot në Kodin Zgjedhor nuk ka lidhje me marrëveshjen, është shtesë.

Por ka lëshuar edhe PD-ja për ju. Ajo lëshoi votimin elektronik, i cili ishte një prej kushteve më të mëdha.

Më fal, kush lëshoi? Pse PD-ja ka votë në parlament?

Në Këshillin Politik pra.

Çfarë Këshilli Politik? Është institucion shtetëror?

Tani që përfundoi votimi thoni kështu për Këshillin Politik?

E kam thënë me kohë.

Aty kanë qëndruar deri në 9 orë të mbyllur dhe nuk paska rëndësi si institucion?

Unë njoh institucionin e Presidentit të Republikës, Kuvendin e Shqipërisë, qeverinë, njoh sistemin e drejtësisë.

Pra nuk e njihni Këshillin Politik?

Këshilli Politik ishte kompromisi që ofroi mazhoranca, po e them edhe një herë.

Edhe opozita.

Opozita parlamentare nuk e ka pranuar, mezi ka hyrë, sepse ka dashur të fusë edhe kërkesat e saj dhe kjo është normale. Opozita në parlament është opozitë e ligjshme, legjitime.

Sigurisht, aq më tepër kur ju ka mbajtur në këmbë si qeveri.

Pa atë opozitë në parlament ne nuk bënim dot ndryshimin, miratimin e Kodit Zgjedhor për të cilin kishim gjetur dakordësi me opozitën jashtëparlamentare. Prandaj opozita jashtëparlamentare duhet t’i thotë një mijë herë faleminderit mazhorancës dhe opozitës parlamentare.

Më shumë duhet t’i thoni ju faleminderit opozitës parlamentare.

Opozitës parlamentare unë i them faleminderit për tri gjëra, e kam thënë. E para, që në momente shumë të rëndësishme për fatet e Shqipërisë ka bashkuar votën me ne, që ka qenë Reforma në Drejtësi. Ju e dini që shumë nga ligjet që lidhen me Reformën në Drejtësi, për të cilat ka pasur pengesa, nuk mund të kalonin pa votën e opozitës parlamentare. Kemi reflektuar vendimet e Gjykatës Kushtetuese, të cilat janë mbajtur peng kur ishte opozita jashtëparlamentare në parlament. E dyta është merita se dha votat për Kodin Zgjedhor dhe e treta, është merita që hapi listat 100%. Tani këto tri merita unë ia njoh opozitës parlamentare.

Dua të ndalem pak edhe te mënyra sesi do të shkohet drejt zgjedhjeve të vitit 2021. Përkatësisht në zonën tuaj elektorale, kudo ku kryetari i partisë ta ketë përcaktuar për të qenë pjesë e listës atje dhe sigurisht, besoj se jeni në listën fituese për shkak edhe të kontributit tuaj politik, ju do të pranonit që të ishit dy-tre vende më poshtë se lista fituese, për të kuptuar se sa vërtet është e mundur, se sa thjesht e ka një deputet për të dalë dhe për të marrë më shumë vota se sa partia?

Ky sistem, që ne do të garojmë për 25 prillin, është disi i veçantë. Dhe është kjo arsyeja që nuk mund të pyetej OSBE-ODIHR-i për sistemin, sepse OSBE-ODIHR-i nuk ndërhyn te sistemet, janë zgjedhje që bëjnë partitë politike, organet. Votohet për partinë, por votohet edhe për kandidatin. Pra e para, zgjedhësi do të votojë për partinë dhe do të japë edhe një votë parapëlqyese për kandidatin. Në këtë periudhë, duke filluar që nga dita e sotme, të gjithë deputetët që jemi aktualisht, pavarësisht se do të jemi apo nuk do të jemi në lista, jemi në proces të vlerësimit brenda partisë. Besoj se ju e dëgjuat kryetarin e PS-së, kryeministrin, dhe aktualisht ne jemi në sistem vlerësimi nga zgjedhësit në zonat zgjedhore ku ne punojmë. Kjo është e para. E dyta, ne kemi tre vlerësime, kemi vlerësim të punës në Kuvend se deputeti nuk është vetëm përfaqësues por ushtron edhe funksione legjislative, edhe të kontrollit parlamentar, edhe të përfaqësimit. Në këtë kuadër ka një proces vlerësimi që unë besoj që do të jetë transparent sepse mënyra se si është bërë sistemi na vë të gjithëve në një pozitë vlerësimi. Pastaj, do të jemi apo nuk do të jemi në listë, këtë do ta tregojë i gjithë rezultati i vlerësimit tonë, si do të na vlerësojnë neve zgjedhësit. Mos harroni që ne nuk jemi në sistemin mazhoritar. Unë p.sh., personalisht do të vlerësoja një sistem mazhoritar sepse zgjedhësi të njeh më mirë dhe zonën e ke të përqendruar dhe i dedikohesh asaj zone. Ndërkohë që ne nuk jemi në sistemin mazhoritar, por vlerësimi bëhet sikur të jesh në sistemin mazhoritar. Prandaj në këtë kuadër kjo ka një specifikë. Unë uroj dhe shpresoj që ajo do të rregullohet në Kodin e ri Zgjedhor. E dyta, ne kemi rregulluar një problem që është përfaqësimi gjinor. Dhe është shumë e rëndësishme që parimi i barazisë gjinore, respektimi i barazisë gjinore, edhe në zgjedhjet e vitit 2021 të respektohet. Dhe ne këtë e bëmë me një ndërhyrje në Kushtetutë edhe sot në Kodin Zgjedhor. Dhe ky element është analizuar shumë pak.

Kemi parë edhe reagimet e krerëve të opozitës jashtë parlamentit ditën e sotme, pas miratimit në Kuvendin e Shqipërisë të ndryshimeve të Kodit Zgjedhor. Basha i quan antikushtetuese dhe do të bëjë gjithçka që ato të mos ruhen. Meta paralajmëron protesta, ndërsa Kryemadhi kërcënon Ramën me burg. Keni një koment për këto reagime?

Janë kështu siç i thoni ju, se nuk i kam dëgjuar?

Po.

E para, e thashë që në fillim të bisedës, ndryshimet që kemi bërë sot në Kodin Zgjedhor lidhen pikërisht me reflektimin e ndryshimeve kushtetuese dhe nuk ka se si të jenë në kundërshtim me Kushtetutën sepse kanë qenë zbërthimi i ndryshimeve kushtetuese. E dyta, Presidenti i Republikës është përfaqësues mbi palët. Është institucioni më i rëndësishëm që i bashkon, i unitetit dhe nuk mund të mbajë pozicione politike sepse unë mund ta mirëkuptoj zotin Basha që mund të shprehë qëndrime politike apo zonjën Kryemadhi sepse janë drejtues të partive politike. Por Presidenti i Republikës të bëjë debat me kryeministrin e vendit për çështjet që lidhen në mënyrë të mirëfilltë me partitë politike, këtë nuk arrij ta kuptoj. Lidhur me qëndrimin e zotit Basha, ai mund ta kontrollojë nismën sa të dojë, por po jua them, ndryshimet sot janë reflektime fjalë për fjalë të Kushtetutës. Në qoftë se ju kujtohet, ne kemi passur një debat me opozitën parlamentare, madje ajo disa herë doli nga Komisioni i Ligjeve, pikërisht sepse ne nuk morëm sugjerime ose amendamente të tjera që kërkonte opozita parlamentare. Kishte edhe shumë propozime të tjera që dilnin jashtë Kushtetutës dhe ne thamë: “Jo, marrëveshjen e 5 qershorit ne nuk e prekim”. Mirë apo keq, ajo është një marrëveshje politike që bëhet për një interes shumë më të madh.

Por që është pa vlerë për zgjedhjet e vitit 2021.

Ndryshimet në Kodin Zgjedhor ne i kemi bërë sipas marrëveshjes së 5 qershorit.

Që ta kuptojnë qytetarët, çfarë vlere ka?

E treta, lidhur me ato që thotë zonja Kryemadhi, që kërcënon me burg, nuk është as zonja Kryemadhi, as unë, as ju, që të kërcënojmë liderët e partive me burg sepse ka institucione që merren me hetime, ka institucione të pavarura që merren gjykime. Pra, nuk janë partitë politike.

Institucionet e fundit që përmendët, opozita akuzon se i kontrolloni ju.

Cilat institucione?

Institucionet vendimmarrëse dhe ligjvënëse, opozita akuzon vazhdimisht se i kontrolloni ju.

E para, mbi të gjitha, po më ktheni në vitin 2017 kur isha pjesë e grupit në përzgjedhjen e organeve dhe kam qenë në këtë studio, në atë karrige, kemi qenë bashkë, dhe kemi diskutuar që edhe kjo shkëputje e organeve të sistemit të drejtësisë nga politika do të kritikohet. Ju kam kërkuar dhe ju kam thënë: “Më thërrisni përsëri në këtë studio pas 2 vitesh sepse do të shikoni që edhe kjo formulë e shkëputur totalisht nga politika do të kritikoht”. Dhe ja ku jemi sot.

Zonja Hysi, do të doja të ndaleshim pak se tek ajo çfarë ndodhi në vitin 2013, se nganjëherë, pavarësisht se politika shqiptare nuk ka treguar ndonjëherë drejtësi apo s’ka menduar për kohën sesi ka qenë vetë, por ju erdhët në vitin 2013 në pushtet falë LSI-së. Dhe ju e dini këtë sepse nuk është se kishit 70 mandate, kishit vetëm 65 mandate dhe falë deputetëve të LSI-së ju erdhët në pushtet. Prandaj ju pyeta për mëkatin në nisje të bisedës, në qoftë se bëtë mëkat kur ndaluat koalicionet parazgjedhore.

E para, kërkoj ndjesë që nuk i jam përgjigjur që në fillim pyetjes suaj. Koalicionet zgjedhore nuk janë të ndaluara. Jo, nuk janë të ndaluara sepse edhe më 2017 partitë politike të opozitës bënë koalicion, sikurse bëmë edhe ne. Por gabimi i opozitës jashtëparlamentare është pikërisht që braktisi institucionet. Beteja bëhet në institucione. Beteja nuk bëhet jashtë institucioneve.

Rrugën ua shtruat ju, se nuk është se nuk keni bërë edhe juve bojkot më 2011.

Por ne nuk i kemi lënë mandatet, ne nuk i kemi djegur mandatet.

Por bojkoti ka shkaktuar problematika në Kuvend.

Ne nuk i kemi djegur mandatet.

Pastaj zoti Berisha ju ka respektuar më shumë se ç’e keni respektuar juve opozitën.

Ne nuk i kemi djegur mandatet dhe ne e kemi respektuar opozitën jashtëparlamentare sepse sot kemi votuar një listë, që po të më pyesnit mua, në ditë të tjera nuk do ta votoja.

Vetëm dekriminalizimin, vetëm një propozim. Vetëm dekriminalizimi është nisma që është marrë seriozisht nga PS-ja.

Ju thatë pak më parë që më shumë kanë dalë nga PS-ja. E di që nuk është e vërtetë kjo që thoni ju?

Pse, kush ka dalë tjetër?

Unë do të vij sërish në studio, ju më thërrisni kur të doni, edhe që javën tjetër, sepse nuk e kam listën sot. Do të vij me të gjithë emrat, nga të gjitha partitë. Dhe do të shikosh, janë nga PS-ja, janë nga PD-ja, nga LSI-ja, PDIU-ja etj.

Po juve nuk ju vjen fare keq për ata persona, kolegët tuaj, që kanë ikur sepse dikush mund të ketë qenë trafikant, dikush është dënuar për prostitucion?

Si të më vijë keq?

Nuk ndiheni keq si forcë politike që u keni dhënë hapësirë personave të tillë?

Mua më vjen keq që kanë hyrë në politikë, por nuk më vjen keq që kanë ikur nga politika.

Sigurisht që jo, por problemi është se ju u keni dhënë hapësirë.

Por ju thoni që këta i kishte shumica parlamentare.

Baras. Më thoni vetëm një që është nga një forcë tjetër politike.

Jo, kushdo qoftë nuk duhet të hyjë në parlament. Prandaj në këtë kuadër, po të shikoni, më shumë tolerime ka bërë kjo mazhorancë. Sot unë kam miratuar, kam ngritur dorën për listë bllok. Ju e dini shumë mirë. Dhe mund të ketë emra në atë listë bllok, një apo dy s’ka rëndësi, që unë nuk do të kisha votuar në rrethana të tjera, për shumë e shumë arsye të tjera.

Ju mund të mos ishit dakord as për ndryshimet në kod, por është partia.

Po, në parti ka edhe vendime politike.

Ju do e merrnit mendimin që të votonit sot për ndryshimet kundër Edi Ramës?

Çfarë ndryshimesh?

Ndryshimet që u bënë sot. Ju mund të ishit një votë kundër? Pra nga 97 vota, meqenëse thatë që nuk ishit dakord për disa gjëra por i votuat.

Në partitë politike ka disa lloje vendimmarrjesh. Ka vendimmarrje politike, që janë të rëndësishme, që nga programi i qeverisë, që nga ministrat që miratohen etj., por ka edhe vendimmarrje të cilat nuk janë politike, pra je i lirë të votosh si të duash. E rëndësishme është që po të ndiqni dhe po të merrni procesverbalet e mbledhjeve të komisioneve, ne kemi pasur debate, kemi qenë të lirshëm të shprehim mendimet dhe opinionet tona. Lexojeni se çfarë kam shprehur unë në debat.

Zoti Bushati është i vetmi që u shpreh kritik dhe mbeti pa postin e drejtuesit politik të Shkodrës. Tani nuk e di se për çfarë debatesh e keni fjalën ju, por ikja e zotit Bushati.

Drejtues politikë në të gjithë Shqipërinë janë 12, deputetë jemi 74. Nuk mund të jemi të gjithë drejtues politikë.

Zotin Bushati e zëvendësuat me zotin Beqja.

Nuk mund të jemi të gjithë drejtues politikë, nuk mund të jemi të gjithë ministra.

Po pra, por menjëherë pasi kritikon qeverinë nuk mund të jesh më drejtues politik, sepse sa ishte në të njëjtën linjë me partinë, aty ishte zoti Bushati. Nëse e ka bërë mirë apo jo punë, pastaj ajo është puna e tij.

Ato janë vendime të kryesisë së PS-së. ÇDO parti ka vendimmarrjet e saj. Është kryetari i partisë që mban përgjegjësinë e vet, kemi kryetarin e grupit, sekretarin e përgjithshëm të partisë. Ka struktura dhe nuk mund të flasim në përgjithësi. Por, ajo që unë do të doja të theksoja, është se PS-ja ka toleruar shumë. Ka toleruar shumë edhe në kuadër të marrëveshjes së 5 qershorit, edhe sot. Dhe ky është kompromisi. Unë para se të hyja në politikë, nuk e kisha menduar që mund të bëja kompromise të tilla. Për nga natyra, jam më shumë juriste tekniciene, sepse juristët të tillë janë në përgjithësi. Por politika më ka mësuar që për hir të interesave shumë më të mëdha, që janë interesat e kombit ose të vendit, të integrimit evropian, mos harro që reforma ka qenë edhe kërkesë për negociatat.

Por ambasada britanike është shprehur ndryshe.

Ju kërkoj ndjesë sepse po vij nga puna dhe nuk e kam lexuar. Zakonisht lajmet i lexoj pas orës 11 të natës.

Regjia na vjen në ndihmë. Ambasada britanike shprehet: “Na vjen keq që nuk pati konsensus për atë që kemi kërkuar për marrëveshjen e 5 qershorit”. Ky është reagimi i ambasadës britanike.

Për marrëveshjen e 5 qershorit ka pasur. Kjo nuk e prek marrëveshjen e 5 qershorit. Nuk e di se ç’ka thënë ambasada, ndoshta ka dashur të thotë që duhej ndjekur e njëjta logjikë si për marrëveshjen e 5 qershorit.

“Marrëveshja e 5 qershorit ishte një hap i rëndësishëm përpara, i arritur përmes dialogut dhe negociatave. Shprehim keqardhjen që ndryshimet e sotme janë bërë pa dakordësinë e Këshillit Politik dhe pa gjetur konsensus”.

Kjo është tjetër gjë.

Pra Këshilli Politik që ju thatë, nuk është se ka ndonjë rëndësi të madhe.

Marrim të parën, marrëveshjen e 5 qershorit. Është vlerësuar dhe ne e kemi vlerësuar.

Po çfarë është vlerësuar?

Po të ishit ju një deputet në Gjermani ose senator në Amerikë, do të pranonit udhëzimet e diplomatëve nga jashtë Gjermanisë dhe SHBA-ve?

Jo, por s’do të pranoja as investime strategjike që bëjmë namin sa herë. Ky është dallimi.

Prandaj marrëveshjen e 5 qershorit ne e respektuam sepse kishim pas partnerë shumë të rëndësishëm që e kanë mbështetur Shqipërinë dhe kontributi i ambasadës së SHBA-së dhe i agjencive amerikane në Shqipëri është jashtëzakonisht i madh. Mos harroni që unë kam qenë pjesë e komisionit ad hoc të reformës në drejtësi dhe kam pasur kënaqësinë të punoj me ekspertët më të mirë, shqiptarë dhe amerikanë. Edhe të BE-së. Pa ata, ajo reformë nuk do të ishte bërë. Për këtë nuk ka diskutim. E dyta, fjalia e dytë që thotë ambasada britanike lidhet me kërkesën që, sikurse jemi marr vesh për ndryshimet në marrëveshjen e 5 qershorit, t’i bënim edhe këto ndryshime. Sa herë kemi kërkuar ne mbledhjen e Këshillit Politik dhe sa herë PD-ja ose partitë e tjera nuk pranonin, por thoshin që do ta çojmë tek OSBE-ODIHR-i? A e dini ju që ka afate në Kodin Zgjedhor dhe nuk mund të bësh ndryshime kur i afrohesh zgjedhjeve dhe 6 muaj para nuk lejohen ndryshime në Kodin Zgjedhor?

Pse vijoi puna e Këshillit Politik edhe pas 5 qershorit?

Sepse ky është pikërisht kompromisi dhe vullneti që shprehu mazhoranca, që megjithëse nuk ishim të detyruar, se nuk kishte lidhje me marrëveshjen e 5 qershorit, kërkuam që ata të shpreheshin. Por akrobaci, pengesa të tilla për ta shtyrë këtë në kalandrat greke siç shtynë reformën në drejtësi, nuk mund të vijojnë më.

Në qoftë se PS-ja do ta fitojë mandatin e tretë, ju synoni një post ministreje?

Jo, nuk ka synuar dhe nuk synoj.

Sepse zoti Rama bën lëvizje surprizë. P.sh. nuk e kishim menduar se zonja Kushi do të bëhej ministre e Arsimit. Dhe një ditë zonjën Hysi mund ta thërrasin.

Ka bërë zgjedhje shumë të mirë. Unë e vlerësoj shumë kolegen Nikolla, e vlerësoj shumë Besa Shahinin, por mendoj që në fund përgjegjësia është e kryeministrit dhe ai e di kabinetin me të cilin do të punojë. Do ta respektoj vendimin e tij. Faktin që zgjodhi zonjën Evis Kushi unë e kam vlerësuar edhe publikisht edhe individualisht. Është vlerësim shumë i mirë. Vjen nga bota akademike, nxënëse e mirë, e arsimit, e studiuar shumë mirë jashtë.

B.K./b.ha./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Mendoni se komisionet hetimore për Shëndetësinë e TIMS do kenë rezultat?



×

Lajmi i fundit

'Kam lindur në Athinë, por jam patriot i atdheut tim': Mario Mitaj: Populli rus i thjeshtë dhe miqësor

'Kam lindur në Athinë, por jam patriot i atdheut tim': Mario Mitaj: Populli rus i thjeshtë dhe miqësor