Një event i rrallë, i organizuar nga “Living Room Entertainment” do të bashkojë zërat e yjeve shqiptarë me ata të artistëve të njohur Serbë, në një koncert miqësie, që edhe një herë, më shumë se gjithcka do të nxjerr në pah anën më të mirë të shqiptarëve: mikpritjen. Artistët më të mirë të muzikës live; Kamela Islamaj, Marsela Cibukaj, Flaka Krelani, Eugent Bushpepa dhe Grupi “Na” do të sjellin live këngët më të njohura rock në vendin tonë, Në mbyllje, kënga “Imagine” e John Lenon, do të bashkojë zërat e të gjithë artistëve, në një performancë të rrallë. Gjithçka live, të mërkurën, ora 19:00, në lulishten prapa Kryeministrisë, në një koncert krejtësisht të veçantë, për një mesazh të vërtetë: “Muzika bashkon njerëzit”.
I pyetur për pjesëmarrjen e tij në këtë koncert, bateristi i grupit serb Vlada Migric, flet jo vetëm për muzikën si një mënyrë për të afruar njerëzit, por edhe për arsyet që e shtynë t’i thotë “po” propozimit të organizatorëve shqiptarë të këtij koncerti.
Hera e parë që vini në Shqipëri?
Po është hera e parë. Ne nuk kemi qenë në Shqipëri, por me sa kemi dëgjuar ju e keni pëlqyer muzikën e mirë të kolegëve tanë që kanë luajtur në vendin tuaj. Ne dimë që Bregoviç ka organizuar një koncert të madh dhe Zdravko Colic e kishte në plan. Sa për ne, më duhet të them që jemi të lumtur që jemi të ftuarit tuaj. Shpresoj t’i përmbushim pritshmëritë tuaja.
Çfarë dini ju për Shqipërinë?
Gjëra bazike. Gjëra që i kemi mësuar në shkollë. Gjithashtu kemi dëgjuar se Shqipëria ka një breg të këndshëm dhe gjithmonë e më shumë njerëz janë duke ardhur për pushime.
Cili është mendimi juaj për marrëdhëniet tona përgjatë viteve?
Ne jemi muzikantë dhe na pëlqen ta çojmë muzikën tonë tek të tjerët. Jemi të lumtur që juve ju pëlqen muzika serbe dhe që mund t’ju sjellim një pjesë të vogël të saj për audiencën tuaj.
Çfarë dini për muzikën shqiptare?
Sikurse e dini, ne ndajmë të njëjtat rrënjë/baza tek muzika ballkanike tradicionale. Ajo prek gjithashtu edhe bazat e muzikës moderne në Serbi dhe Shqipëri. Disa nga këngët më popullore të muzikës pop-rock serbe, janë ato që kanë brenda ritme tradicionale.
Çfarë ju bëri t’i thoni “po” idesë së një koncerti në Tiranë, pikërisht përpara ndeshjes? Ishte ky një vendim i vështirë?
Ishte mendimi për t’i afruar pak më shumë me njëri-tjetrin vendet tona. Përse të mos e bëjmë këtë përmes muzikës? Si profesionistë ne kemi luajtur në të gjithë globin në situata nga më të ndryshmet dhe ftesa juaj ishte interesante për ne. Ne kemi përfaqësuar vendin tonë në çdo vend ku kemi luajtur, ndaj edhe në këtë rast është e njëjta gjë.
Do ta ndiqni ndeshjen Shqipëri-Serbi dhe ku?
Ne jemi të gjithë muzikantë dhe kemi angazhime mbrëmjen e 8 Tetorit, por do ta mbështesim skuadrën tonë atë natë!
*Shkrimi u botua ne gazeten print Shqiptarja.com
Redaksia Online
(Gre.M/Shqiptarja.com)