INUK "rrëzon" Bashën: Të
ndërpriten punimet te Liqeni
PDF - Ja pse u pezulluan ndërtimet

TIRANE - Punimet për ndërtimin e komplekseve të pallateve vetëm 10 metra larg nga Diga e Liqenit Artificial në Tiranë do të ndërpriten. Urdhri është dhënë nga Inspektorati Ndërtimor Urbanistik Kombëtar duke shpallur të pavlefshme vendimet e Bashkisë së Tiranës për ndërtimin e pallateve shumëkatëshe në rrugën “Kristo Luarasi” të kompanisë ndërtuese “Gener 2” sh.p.k.
 
“Vendimi i INUK është në ushtrim të detyrave dhe përgjegjësive të veta ligjore”, thuhet në një njoftim të INUK.

Ndërtimi i kompleksit të pallate në zonën e Liqenit Artificial u bë objekt akuzash e kundërakuzash mes opozitës dhe mazhorancës. Sipas socialistëve, me këto vendime, lideri i opozitës Lulzim Basha, në cilësinë e kreut të Bashkisë Tiranë, po dëmtonte hapësirat e gjelbërta të kryeqytetit.
 
Ndërsa, Bashkia në qëndrimet e saj pati deklaruar më herët se projekti nuk dëmton hapësirat e gjelbërta pasi vetëm 40 % do të jetë ndërtim në truall privat dhe pjesa tjetër do të jetë lulishte.

Edhe ambientalistët janë shprehur kundër shkatërrimit të hapësirës së gjelbërt në kryeqytet.

A1 Report e ka ngritur më parë një shqetësim të tillë, ku vetëm 10 metra larg digës së liqenit nisi ndërtimi i një godinë 17 katëshe, e cila është pajisur me leje nga Bashkia e kryeqytetit në gusht të këtij viti. Kujtojmë se firma që po ndërton këtë kompleks “Gener-2” është e biznesmenit Bashkim Ulaj, që njihet si njeri shumë i afërt i familjes së ish-kryeministrit Berisha.