Sekretari i Mbrojtjes Hegseth thekson se Shtetet e Bashkuara mund ta vazhdojnë luftën në Iran për një kohë shumë të gjatë “falë një furnizimi të madh me armë dhe municione”.

Ai shtoi se sulmet e SHBA ndaj Iranit pritet të “rriten ndjeshëm”, duke shtuar se qasja në bazën britanike Diego Garcia do ta ndihmonte Uashingtonin të intensifikojë sulmet.

Kjo deklaratë vjen pasi edhe Dhoma e Përfaqësuesve e SHBA-ve refuzoi kërkesën për të vendosur kufizime ndaj Trump lidhur me operacionin në Lindjen e Mesme.

Presidenti Donald Trump tha se nuk po shqyrton dërgimin e trupave në Iran, duke e quajtur këtë një “humbje kohe”, dhe shtoi se Teherani “ka humbur gjithçka që mund të humbte”.

Teherani, përmes zëdhënësit të ministrit të Jashtëm, kërcënon Europën duke thënë se do ta paguajë çmimin e heshtjes së saj për shkeljen e ligjit ndërkombëtar. Ndërkohë, vazhdojnë sulmet ajrore izraelite në Liban kundër Hezbollahut.

Izraeli ka ndërmarrë sulme të reja ndaj Teheranit dhe Bejrutit, ndërsa Irani thotë se ka lëshuar raketa drejt Tel Avivit, ndërsa lufta ka hyrë në ditën e shtatë.

Rendit zhvillimet sipas orarit:
Ora 09:18
Trump thirrje diplomatëve iranianë në botë: Kërkoni azil, na ndihmoni për një Iran të ri

Presidenti amerikan Donald Trump ka inkurajuar diplomatët iranianë në mbarë botën që të kërkojnë azil, pasi deklaroi se Shtetet e Bashkuara janë “shumë përpara në kohë” në luftën e zhvilluar me Izraelin kundër Iranit.

“U bëjmë thirrje edhe diplomatëve iranianë në mbarë botën të kërkojnë azil dhe të na ndihmojnë të formësojmë një Iran të ri dhe më të mirë, me potencial të madh,” tha ai.

P.J/Shqiptarja.com

Ora 08:43
‘Sulmet amerikane në Iran do të rriten ndjeshëm’, sekretari i Mbrojtjes: Mund të luftojmë sa kohë të duam

Në Komandën Qendrore të SHBA-ve mbrëmjen e kaluar, Sekretari amerikan i Mbrojtjes Pete Hegseth, admirali Brad Cooper dhe presidenti Donald Trump mbajtën një konferencë informuese për operacionet ushtarake të SHBA-ve kundër Iranit.

Hegseth tha se “sulmet mbi Iranin dhe Teheranin do të rriten në mënyrë dramatike shumë shpejt.” Ai u shpreh se SHBA mund ta vazhdojë luftën kundër Iranit për aq kohë sa dëshiron.

“Ne mund ta vazhdojmë luftën në Iran për sa kohë të duam. Municionet tona sulmuese dhe mbrojtëse na e mundësojnë këtë,” tha ai.

Ai shtoi se vendimi i Mbretërisë së Bashkuar për t’i lejuar SHBA-ve përdorimin e bazës ushtarake Diego Garcia do ta ndihmojë Uashingtonin të intensifikojë sulmet.

“Ishte për të ardhur keq që britanikët nuk thanë që në ditën e parë: ‘Po, vazhdoni dhe përdoreni bazën’,” tha Hegseth. “Por në fund arritëm aty.”

Ndërkohë, kryeministri britanik Keir Starmer tha se Mbretëria e Bashkuar do të dërgojë katër avionë luftarakë shtesë Typhoon për t’iu bashkuar skuadrës britanike në Doha, në Katar. Ai shtoi se Britania i ka lejuar SHBA-ve të përdorë bazat britanike “për të kryer operacione mbrojtëse.”

P.J/Shqiptarja.com

Ora 08:33
Ndërhyrje tokësore në Iran? Trump: Humbje kohe, kanë humbur gjithçka mundnin

Donald Trump tha për NBC News se dërgimi i trupave amerikane në Iran tani për tani do të ishte një “humbje kohe” dhe se nuk është diçka që ai po e konsideron aktualisht.

“Është humbje kohe. Ata kanë humbur gjithçka. Kanë humbur flotën e tyre detare. Kanë humbur gjithçka që mund të humbnin,” tha Trump.

Ai shtoi gjithashtu se komenti i mëparshëm i ministrit të Jashtëm iranian, Abbas Araghchi se Irani është i gatshëm për një pushtim tokësor nga SHBA ose Izraeli, ishte “i kotë”.

Trump tha gjithashtu se dëshiron të “pastrojë” strukturën aktuale të udhëheqjes në Iran.

“Ne duam që ata të kenë një udhëheqës të mirë. Kemi disa njerëz për të cilët mendoj se do të bënin një punë të mirë,” tha ai, pa përmendur emra.

P.J/Shqiptarja.com

Ora 08:26
Shpenzime të paimagjinueshme! Lufta kundër Iranit po kushton mbi 890 milionë dollarë në ditë, 3.7 miliardë dollarë u shpenzuan në 100 orët e para

1772782167_teheran.jpg

Mediat amerikane raportojnë se lufta po kushton mbi 890 milionë dollarë në ditë.

Sipas një analize nga Qendra për Studime Strategjike dhe Ndërkombëtare, të botuar të enjten dhe të raportuar nga CNN, 100 orët e para të fushatës ushtarake amerikane kundër Iranit vlerësohet të kenë kushtuar 3.7 miliardë dollarë, ose më shumë se 890 milionë dollarë në ditë.

Më pak se 200 milionë dollarë nga ky vlerësim total janë kosto operative të përfshira tashmë në buxhetin e Pentagonit. Nga ana tjetër, 3.54 miliardë dollarët e mbetur të kostos së vlerësuar "ka të ngjarë të kërkojnë fonde shtesë nga Departamenti i Mbrojtjes përmes një shpërndarjeje shtesë ose një fature tjetër", thanë analistët.

Përtej kostove operative dhe mbështetëse, shpjegon raporti, shpenzimet kryesore pritet të jenë zëvendësimi i municioneve, veçanërisht i rëndësishëm duke pasur parasysh shqetësimet në lidhje me rezervat e municioneve interceptuese të SHBA-së dhe aleatëve të saj, dhe humbjen e pajisjeve të tilla si tre F-15 të rrëzuara në një incident zjarri miqësor në Kuvajt. Në të ardhmen, shkruajnë autorët e studimit, kostot mund të ndryshojnë bazuar në një "zhvendosje të forcave amerikane drejt municioneve më pak të shtrenjta", si dhe "intensitetin e operacioneve dhe efektivitetin e hakmarrjes iraniane".

P.J/Shqiptarja.com

Ora 07:57
Bilanci tragjik i një jave, UNICEF: Gati 200 fëmijë të vrarë që nga fillimi i luftës në Lindjen e Mesme

UNICEF deklaron se gati 200 fëmijë janë vrarë nga lufta në Lindjen e Mesme, kur filloi përshkallëzimi ushtarak i Shteteve të Bashkuara dhe Izraelit kundër Iranit.

Të paktën 181 persona janë vrarë në Iran, 7 në Liban, 3 në Izrael dhe 1 në Kuvajt.

“Nuk janë fëmijët ata që i nisin luftërat, por ata paguajnë një çmim të papranueshëm të lartë. Përshkallëzimi ushtarak në Lindjen e Mesme tashmë ka pasur një ndikim shkatërrues mbi fëmijët”, deklaroi UNICEF.

P.J/Shqiptarja.com