Itali, kapet Golia shqiptar
Në rrugë me 220 mijë euro

BRESCIA – Telefonatat anonime se, në lagje kishte lëvizje të dyshimta të femrave e meshkujve, e vunë sërish në punë policinë e Brescias. Dhe ajo çka gjetën nuk ishte imagjinuar kurrë: një mal me euro, plot 220 mijë të tilla dhe një mitraloz Skorpion, armë lufte, e shkurtër dhe vrasëse.
Në fakt karabinierët, nisën kontrollin në rrugën “Aldo Moro” pas fjalëve se, në një apartament prej pak kohësh kishte lëvizje të shumta të femrave dhe meshkujve. Gjë e çuditshme kjo për një zonë ku zyrtarisht dihej se jetojnë prostituta.

“GJIGANDI GOLIA”, GRUSHTA POLICISË
Policia u nis drejt vendngjarjes me prostitucionin si pistë hetimi. Por, në momentin kur karabinierët vendosën të kontrollonin shtëpinë e dyshuar, nga dera e saj ka dalë një mashkull me një çantë krahu. “Një lloj gjigandi, gati dy metra i gjatë. Dhe muskul i tëri”, raportojnë mediat italiane.
Për policinë, i riu ishte fytyrë e panjohur dhe sipas proçedurave i kanë kërkuar dokumentat.

Por, “gjigandi” në vend të të dhënave personale, i ka dhënë policëve grushta në fytyrë. Vënia e prangave ka qenë e vështirë për karabinierët pasi, i riu veç shtatlartësisë ishte edhe i armatosur. Mësohet se bëhet fjalë për një 31 vjeçar shqiptar, me inicialet A.D për të kaluarën e të cilit sikundër edhe për gjendjen aktuale policia italiane nuk ka asnjë të dhënë. E vetmja gjë që dihet është që i riu është emigrant dhe nuk ka asnjë precedent penal në Itali.

ARMA, 750 PLUMBA NË MINUTË
Mediat raportojnë se arma, e cila u gjet në banesën e 31 vjeçarit është e tipit Skorpion, prodhim çekosllovak me një goditje prej 750 plumbash në minutë. Interesant është fakti që me këtë armë u vra edhe Aldo Moro, ish kryeministri italian i ekzekutuar shume vite perpara nga "Brigate Rosse", emrin e të cilin mban dhe rruga ku u arrestua “gjigandi”.
Sa për shqiptarin, policia thotë se qëndron në heshtje të plotë dhe nuk jep asnjë shpjegim se cili është burimi i 220 mijë eurove, ose 300 milion lekë të konvertuara në lekë shqiptare.