Iu shemb shtëpia në Himarë
banori: Jam mik me Edi RamënIKMT vijon në ditën e dytë aksionin

Banorët e Himarës janë shprehur të revoltuar me qeverinë e cila sipas tyre po iu prish shtëpitë dhe po u rrëmben pronat, ndërsa ngrejnë dyshime për qëllimet e vërteta të aksionit i cili vijon prej dy ditësh.

Mes banorëve të prekur nga projekti i Bashkisë së Himarës për zgjatimin e lulishtes përgjatë bregdetit ka edhe nga ata që identifikohen si miq të kryeministrit Edi Rama, por kjo nuk e ka shpëtuar pronën e tyre. “Ne himarjotët jemi autoktonë dhe jemi në këtë tokë më të vjetër se dielli që shikoni. Ne nuk do na gjunjëzojë as Rama, unë jam mik personal i Ramës, por asnjë s’do ta gjunjëzojë dot revolucionin e Himarës”, theksoi banori. 

Himarjotët ngrejnë shqetësimin se në tokat ku deri dje ishin banesat e tyre do ndërtohen pallate. Ata thonë se sekserët e ardhura nga Tirana por edhe himarjotë vendas janë interesuar për të blerë tokat me qëllim, sipas tyre, ndërtimin e pallateve shumëkatëshe. "Ta dinë se nuk do gëzojnë asgjë edhe sikur t’i marrin, ne do iu mbijmë nga poshtë. Vijnë sekserë nga Tirana dhe Himara, ofrojnë që të marrin tokat dhe të bëjnë pallate", tha një prej banorëve.  

“Qeveria socialiste dhe Edi Rama na shkatërroi Himarën. Erdhën 500 polica në mëngjes për të na rrëzuar shtëpitë, për të na marrë tokat”, tha një banore tjetër të cilës i është shembur shtëpia për t’i hapur rrugë ndërtimit të shëtitores përgjatë bregdetit. 

Aksioni i IKMT i cili ka nisur ditën e djeshme për prishjen e objekteve, ka vijuar sot në ditën e dytë. Janë rreth 80 objekte banimi dhe biznese të cilat do shemben për t'i hapur rrugë projektit të rikualifikimit të shëtitores së qytezës bregdetare.  

Redaksia Online
l.q/Shqiptarja.com