Izraeli në javën e 10-të të protestave kundër kufizimit të kompetencave të gjyqësorit! Ushtarakët kërcënojnë me 'dezertim'

Izraelitët mbushën rrugët e qytetit të shtunën në demonstratat mbarëkombëtare tashmë në javën e tyre të 10-të kundër planeve të qeverisë së djathtë për të frenuar kompetencat e Gjykatës së Lartë, lëvizje të cilën kritikët e shohin si një kërcënim për pavarësinë e gjyqësorit.

Kryeministri Benjamin Netanyahu, i cili thotë se qëllimi i tij është të balancojë degët e qeverisë, zotëron një shumicë parlamentare së bashku me aleatët e tij të koalicionit fetar-nacionalist.

Ndërsa reformat shkojnë drejt ratifikimit, protestat janë përshkallëzuar. Disa rezervistë ushtarakë kanë kërcënuar se nuk do të dëgjojnë urdhrat. Presidenti Isaac Herzog ka apeluar që rishikimi të shtyhet dhe të zhvillohet dialogu.

"Kjo nuk është një reformë gjyqësore. Është një revolucion që po e bën Izraelin të shkojë në diktaturë të plotë dhe unë dua që Izraeli të mbetet një demokraci për fëmijët e mi," tha Tamir Guytsabri, mes dhjetëra mijëra demonstruesve që u mblodhën në qendër të Tel. Aviv.

Protestat ishin kryesisht paqësore, megjithëse u raportuan disa plagosje dhe arrestime mes protestuesve kur policia ndërhyri kundër përpjekjeve për të bllokuar trafikun.

Netanyahu, i cili u kthye në detyrë për një mandat të gjashtë në fund të dhjetorit, thotë se demonstratat kanë për qëllim rrëzimin e tij. Ai është në gjyq për tre raste korrupsioni dhe mohon të gjitha keqbërjet.

B.V/KT/Shqiptarja.com

TAG:
• Izrael
• Benjamin Netanyahu