Gaza/ Izraeli: Tre trupat e fundit të dorëzuar nuk i përkasin asnjërit prej pengjeve! Kamioni me ndihma u plaçkit

Sekretari i Shtetit i SHBA-së, Marco Rubio, thotë se Hamasi ka vazhduar të sekuestrojë ndihmën humanitare të destinuar për civilët në nevojë në Gaza që kur armëpushimi hyri në fuqi muajin e kaluar, raporton Times of Israel. Rubio ndan pamjet e dronit të publikuara nga Komanda Qendrore e SHBA-së, që supozohet se tregojnë operativët e Hamasit duke marrë kontrollin e një kamioni që transportonte ndihma në Gazën veriore dje.

"Hamasi vazhdon t'i privojë njerëzit e Gazës nga ndihma humanitare që i nevojitet urgjentisht. Kjo vjedhje minon përpjekjet ndërkombëtare për të mbështetur Planin 20-Pikësh të Presidentit Trump për të ofruar ndihmë kritike për civilët e pafajshëm. Hamasi është pengesa. Ata duhet të ulin armët dhe të ndalojnë plaçkitjet në mënyrë që Gaza të ketë një të ardhme më të mirë", shton diplomati amerikan.

Ministria e Shëndetësisë e Gazës njoftoi në një deklaratë se gjatë 24 orëve të fundit, pesë persona janë vrarë dhe 17 trupa janë gjetur në Gaza.

Numri i përgjithshëm i të vdekurve nga lufta në Rrip është rritur në 68,858, me 170,664 të plagosur.

"Shumë viktima mbeten nën rrënoja dhe në rrugë, pasi ambulancat dhe ekipet e mbrojtjes civile deri më tani nuk kanë qenë në gjendje t'i arrijnë", deklaroi Ministria.

Brigadat Ezzedin al-Qassam, krahu i armatosur i Hamasit, kanë deklaruar se synojnë të rikuperojnë së bashku trupat e 11 pengjeve që kanë mbetur në Gaza, por kanë nevojë për ndihmë.
“Brigadat u kërkojnë ndërmjetësve dhe Komitetit Ndërkombëtar të Kryqit të Kuq të sigurojnë dhe të përgatisin pajisjet e nevojshme për të rikuperuar të gjitha trupat njëherësh,” – thuhet në deklaratën e grupit.

Por jo vetëm kaq. Për të përfunduar kërkimet, është e nevojshme të kalohet përtej “Vijës së Verdhe”, në atë 53% të territorit të Gazës që ndodhet nën kontrollin ushtarak izraelit. Sa i përket mbetjeve të tre trupave të dorëzuar dje, Hamasi ka përsëritur se kishte njoftuar më parë se nuk dinte kujt i përkisnin.

“Ne propozuam të dorëzonim tre mostra trupash të paidentifikuar, por armiku refuzoi t’i pranonte dhe kërkoi trupat e plotë për analizë. Ne vazhduam me dorëzimin për të parandaluar pretendime të ardhshme nga Izraeli,” – thuhet më tej në komunikatë.

Tridhjetë vjet pas vrasjes së të atit, Yitzhak Rabin, Yuval Rabin thyen heshtjen. Ai drejton gishtin nga kryeministri izraelit Benjamin Netanyahu, duke e akuzuar se në fakt ka mbrojtur Hamasin dhe se tani është i interesuar vetëm për mbijetesën e tij politike. 

Rabin jeton prej 10 vitesh në një fshat të Evropës Qendrore, bashkë me bashkëshorten e tij, Natalie, dhe është larguar nga jeta publike. Ai është gjetur dhe intervistuar nga televizioni izraelit Kanal 12, vetëm pak ditë para përvjetorit të vdekjes së ish-kryeministrit laburist Yitzhak Rabin, i vrarë më 4 nëntor 1995, në fund të një tubimi për paqen në Tel Aviv, nga një ekstremist i djathtë dhe fanatik fetar, Yigal Amir.

Rabin pagoi me jetën për Marrëveshjet e Oslos, të nënshkruara me Yasser Arafatin, që synonin të sillnin paqen dhe bashkëjetesën mes dy popujve.

Kur Yuvalit iu kërkua të shpjegonte si do të kishte reaguar i ati ndaj situatës aktuale që po përjeton Izraeli, ai u përgjigj:
“Do të ishte i tronditur,” – tha ai në këtë intervistë të rrallë.

Yuval kujton klimën e urrejtjes ndaj të atit, e nxitur nga figura të së djathtës, përfshirë kryeministrin Benjamin Netanyahu dhe ministrin aktual të Sigurisë Kombëtare, Itamar Ben Gvir.
Kaq e thellë ishte kjo armiqësi, saqë në funeralin e Yitzhak Rabinit, nëna e tij Leah refuzoi t’i shtrëngonte dorën Netanyahut.

Yuvali, megjithatë, e ka takuar kryeministrin aktual dhe përshkrimi që jep për të është i qartë:
“Ky njeri është i ftohtë, nuk ndien, nuk dëgjon. Mendon vetëm për përfitimin që mund të nxjerrë nga çdo situatë,” – thekson ai.
“Është i shtyrë vetëm nga opinioni publik dhe nga dëshira për të mbijetuar politikisht, madje edhe kur bëhet fjalë për procesin gjyqësor ndaj tij.”

I ati, Yitzhak Rabin, kishte zgjedhur të jepte dorëheqjen pasi u zbulua se bashkëshortja e tij, Leah, kishte një llogari bankare në dollarë në një bankë në Shtetet e Bashkuara — gjë që në atë kohë ishte e ndaluar.
“Ai nuk donte ta shihte shtetin e Izraelit në përplasje me Kryeministrin e tij. Sepse asgjë e tillë nuk duhet të ndodhë – dhe këtë po e shohim sot me sytë tanë,” – përfundon Yuval Rabin.

Burime mjekësore në Gaza, thonë, se dy palestinezë janë vrarë dhe një i tretë është plagosur nga forcat izraelite në zona të ndryshme të Rripit të Gazës. Lajmin e raporton agjencia palestineze Wafa.Spitali Al-Awda në Nuseirat ka bërë të ditur se ka pranuar trupin e një palestinezi, i cili u gjet nga banorët e qytetit Al-Zahra. Spitali ka trajtuar edhe një person tjetër të plagosur nga të shtënat izraelite në lindje të kampit të refugjatëve Al-Bureij, në pjesën qendrore të Rripit të Gazës. Sipas burimeve mjekësore, një burrë palestinez ka vdekur gjithashtu nga plagët e marra dje për shkak të të shtënave izraelite në lagjen Shuja’iyya, në lindje të qytetit të Gazës.

69% e izraelitëve mendojnë se vendi i tyre është shndërruar në një shtet vasal të Amerikës. Kështu bëhet e ditur nga një sondazh i Kanalit 12. Sipas të njëjtit studim, 67% e izraelitëve mendojnë gjithashtu se aktualisht janë Shtetet e Bashkuara ato që vendosin për operacionet e forcave të armatosura në Gaza.