Të paktën 18 palestinezë janë vrarë në sulmet izraelite të sotme në Gaza. Shifrat raportohen nga al Jazeera që citon burimeve spitalore. Njëmbëdhjetë prej tyre u vranë në lagjet al-Tuffah dhe al-Zaytoun në qytetin e Gazës. Sipas medias “Gaza Now” në Rripin e Gazës avionë luftarakë izraelitë goditën një tendë të personave të zhvendosur në kampin al-Mawasi, në jug të enklavës, dhe ka publikuar një video ku shihet tym mbi zonë.

Deri më tani, ushtria izraelite nuk ka dhënë deklarata për këtë sulm specifik. Ndërkohë në veri të rripit të Gazës, sipas mediave palestineze, të paktën gjashtë nga viktimat u vranë, ku ushtria izraelite thotë se ka kthyer zjarrin ndaj personave të armatosur që sulmuan trupat.

Times of Israel shpjegon se IDF ka kryer bombardime me tanke dhe sulme ajrore në veri të Gazës pasi persona të armatosur sulmuan trupat e saj, duke plagosur rëndë një oficer.

Sipas ushtrisë, një rezervist u qëllua me armë zjarri nga “terroristë” palestinezë në Rripin verior të Gazës gjatë natës kur trupat e Brigadës Alexandroni u sulmuan në anën izraelite të Vijës së Verdhë, që ndan zonat e kontrolluara nga Izraeli dhe Hamasi në Enklavë. Sipas Times of Israel, pritet që ushtria të kryejë sulme të tjera kundër Hamasit, për atë që IDF e konsideron një “shkelje të qartë” të armëpushimit që hyri në fuqi në tetor.

Ndërkohë një raport nga organizata izraelite për të drejtat e njeriut B'Tselem, i ka përshkruar kushtet për palestinezët që mbahen në burgjet izraelite, si tejet çnjerëzore.

Rendit zhvillimet sipas orarit:
Ora 15:23
Raporti i organizatës ‘B'Tselem’: Kushtet për palestinezët në burgjet izraelite janë çnjerëzore me mbipopullim, abuzime dhe uri të qëllimshme

1770215113_burgjetizraelite.JPG

Më shumë se 9 mijë palestinezë mbahen aktualisht në burgjet izraelite, sipas një raporti nga organizata izraelite për të drejtat e njeriut B'Tselem, i cili përshkruan trajtimin çnjerëzor që ata durojnë.

Sipas mediave të huaja, Raporti thekson se të paktën 84 palestinezë kanë vdekur në qendrat e paraburgimit izraelit që nga tetori i vitit 2023. Izraeli ende nuk ka dorëzuar 80 prej trupave të viktimave.

Sipas dëshmive të mbledhura nga B'Tselem, palestinezët përballen me abuzim sistematik fizik, psikologjik dhe seksual. Organizata i përshkroi burgjet izraelite si një rrjet kampesh torture.

Thuhet se mohimi i kujdesit mjekësor për të burgosurit është një metodë torture në vetvete dhe çon në dëme të pakthyeshme, të tilla si amputime dhe humbje të dëgjimit e shikimit.

Raporti deklaroi gjithashtu se kushtet e jetesës në burgjet izraelite mbeten çnjerëzore me mbipopullim, prangosje të tejzgjatura, uri të qëllimshme dhe mohim të higjienës bazë.

R.Xh/Shqiptarja.com