Ja lidhjet mes viktimave e
të plagosurve me precedentë

Eno Bedalli 38 vjeç, një nga tre personat që mbetën të vdekur mbrëmjen e të mërkurës në atentatin e përgjakshëm në Elbasan, njihet si një nga miqtë e familjes Çapja.
 
Bedalli është mik i ngushtë me Agron Çapjen, i cili gjithashtu humbi jetën në atentatin e 3 shkurtit, si pasojë e breshërisë së plumbave automatike që u lëshuan ndaj lokalit në pronësi të tij.
 
Viktima e tretë është Ardit Sinakolli, i cili e kishte dajë Agron Çapjen, ky i fundi një prej vëllezërve të Sokol Çapjes i vrarë në vitin 2015.
 
Eno Bedalli është arrestuar në Itali në qershor të vitit 2013, i akuzuar si pjesë e një organizate të trafikut të drogës. Sipas policisë italiane vlera e drogës së trafikuar nga organizata e Bedallit, arrinte në 10 milionë euro. Në operacionin e kapjes së anëtarëve të bandës u përfshinë 300 policë të zonës së Astit dhe Val D’Aostas. Sipas hetimit të policisë italiane, Eno Bedalli rezultonte se së bashku me disa shqiptarë të tjerë kishin trafikuar 31 kilogramë kokainë. Droga mendohet se vinte nga Holanda dhe hynte në Itali nëpërmjet kufirit të Veriut.

Më pas lënda narkotike, e llojit kokainë, tregtohej në Asti, Udine, Breshia, Savona, Xhenova, Piza, Parma dhe Milano.
 
Në atentatin e të mërkurës mbeti i plagosur edhe Arnold Çapja, djali i Agron Çapjes, vëllai i këtij të fundit, Fejzullah Çapja si dhe djali i tij, Florenc Çapja.
 
Florenc Çapja njihet edhe si një nga personat kryesorë të dyshuar për atentatet ndaj grupit rival të tyre, ndaj familjes Mema dhe të afërmve të tjerë të tyre.
 
I vrari i tretë është Ardit Sinakolli, 27 vjeçar, i njohur policia si mik i afërt i grupit dhe i familjes Çapja.
 
Personat e tjerë, Ferit Muça dhe Luan Muça, janë persona të afërt po ashtu me familjen Çapja, por ata nuk rezultojnë sipas policisë si të dyshuar në ndonjë veprimtari kriminale.
 
Ndërsa nuk ka të dhëna për personin e fundit të plagosur Bujar Rreshka.

Redaksia Online
(u.s/shqiptarja.com)
 

TAG:
• eno bedalli