Jahjaga: Zgjedhjet përmbushën
testin e pjekurisë demokratike

PRISHTINE- Presidentja Atifete Jahjaga, vlerëson se zgjedhjet komunale në rundin e dytë, në 25 komuna të Kosovës kanë treguar përkushtimin e qytetarëve të vendit për ndërtimin e një shoqërie demokratike përmes votimit të lirë dhe të ndershëm në gjithë territorin e Kosovës.

Presidentja Jahjaga përgëzon qytetarët e Republikës së Kosovës për angazhimin e tyre që procesi i zgjedhjeve të jetë një shembull i një organizmi të mirë. Ajo vlerëson edhe pjesëmarrjen e qytetarëve të komunitetit serb, posaçërisht të atyre në veri të territorit të Republikës së Kosovës, si shprehje e vullnetit të tyre për t’u integruar në institucionet dhe shoqërinë e Kosovës, që do të ndihmojë vazhdimin e proceseve demokratike të vendit.

“Zgjedhjet komunale të organizuara për herë të parë në gjithë territorin e Republikës së Kosovës kanë dëshmuar një mbarëvajtje të një procesi të organizuar tërësisht nga institucionet e vendit me një pjesëmarrje të kënaqshme të qytetarëve në të dyja raundet e votimit. Puna e të gjithë mekanizmave përgjegjës për organizimin, mbarëvajtjen dhe sigurinë e zgjedhjeve komunale gjatë gjithë këtij procesi ka rezultuar me garantimin e standardeve të përcaktuara për zgjedhje të ndershme dhe demokratike, të lira dhe të drejta.

Vota e qytetarëve të Republikës së Kosovës është vota për të tashmen dhe të nesërmen e vendit, një votë tashmë e dëshmuar për rrugën e pandalshme të integrimeve evropiane.
Testi i pjekurisë demokratike dhe i shoqërisë së vendosur për të ndërtuar një të ardhme më të mirë, është përmbushur me zgjedhjet e 1 Dhjetorit. Këto zgjedhje shënojnë hapin tonë përpara drejt integrimit të vendit, të secilit qytetar të Republikës së Kosovës në institucionet e vendit dhe ato janë dëshmia më e mirë se të ardhmen mund ta ndërtojmë së bashku.

Përmbyllja e këtij procesi zgjedhor, në mënyrë të qetë dhe demokratike, dhe në mënyrë të dinjitetshme do të sigurojë për Republikën e Kosovës stabilitetin dhe paqen, do t’u ndihmojë qytetarëve të vendit përparimin dhe zhvillimin dhe do t’i hap edhe më tutje perspektivën euro-atlantike vendit tonë’, thuhet në deklaratën e presidentes Jahjaga.

Marrë nga "Radio Evropa e Lirë"

Redaksia Online
(e.s/shqiptarja.com)