Javën tjetër nis riparimi i
varrezave ortodokse

PRISHTINE- Prej javës së ardhshme gjashtë komuna të Kosovës ku ka pasur dëmtim të varrezave ortodokse do të marrin udhëzimet administrative për të filluar procesin e riparimit të tyre. Menderes Ibra, Këshilltar i Ministrit të Financave ka thënë se mjetet janë ndarë dhe mund menjëherë të fillohet me punën.

“Qeveria ka marr një vendim për ndarjen e 90 mijë eurove për riparim varrezash. Tani i përket Ministrisë së Pushtetit Lokal që të menaxhojë këtë proces”, i ka thënë Ibra Radio Kosovës.

Sekretari i Përhershëm i Ministrisë së Administrimit të Pushtetit Lokal, Besnik Osmani ka thënë se nga java e ardhshme do të fillojë procesi administrativ ku komunat janë përgjegjëse për vlerësimin e dhe më pas nisjen e riparimeve në të gjitha lokacionet ku ka pasur dëmtime.

Nexhmedin Arfi, Kryetari i Vitisë, njëra nga komunat ku ka më së shumti dëmtime varrezash ka thënë se deri më tani nuk kanë bërë ndonjë analizë të dëmeve dhe kostos së tyre.

“Nuk kemi marr asnjë udhëzim apo mjet nga qeveria dhe as nuk kemi bërë ende ndonjë vlerësim të dëmit si komunë”, ka thënë Arifi për Radio Kosovën.

Megjithëse janë arrestuar disa persona të dyshuar, deri më tani nuk janë qartësuar adresa dhe motivi i dëmtimit të këtyre varrezave. Vala e dëmtimit të tyre erdhi pak kohë pasi në Preshevë u hoq lapidari i ushtarëve shqiptarë të rënë gjatë konfliktit në Luginë të Preshevës.

Riparimin e varrezave ka shprehur gatishmërinë ta bëjë edhe Kisha Ortodokse serbe. Përfaqësues të klerit ortodoks në deklarime për media kanë thënë se nëse këtë nuk e bëjnë autoritet kosovare riparimi do të bëhet me mbështetjen e kishës. Sipas një raporti të OSBE-së ekzistojnë rreth 390 lokacione varrezash ortodokse të dëmtuara në gjithë Kosovën.

Redaksia online
(sg/shqiptarja.com)

TAG:
• OSBE