Jeta e të moshuarës që jeton me
mbetjet, PD: Plehrat janë rrënim

Safije Cani është 80-vjeçe, banon në Laprakë, dhe jeton duke rrënuar nëpër kazanët e plehrave. E braktisur në çdo drejtim nga shteti, paratë që nxjerr nuk i dalin as për të paguar dritat e as për ilaçe.

Ky është rasti i sjellë nga Partia Demokratike e cila përmes këtij shembulli sjell në vëmendje çështjen e importit të mbetjeve ku thotë se ato e rrënojnë një vend.

Ka qenë Sekretari për Aksionin Qytetar që ka parë nga afër kushtet e vështira ku jeton 80-vjeçarja  nga ku ka thënë se mbetjet që Edi Rama po ia përcjell qytetarëve si shpëtimin ekonomik të vendit, janë në fakt një mjerim. Janë biznes për klientët e tij dhe për mafian e plehrave, por për njerëzit janë shkatërrim.

“Jam 80 vjeç dhe jetoj vetëm. Mbledh kanaçe përditë, mos i paça kalamajtë. Fëmijët kanë ikur në Azil. Nuk kam askënd”, thotë ajo.

Salianji: Sa lekë fiton me këto?

E moshuara: 500 lekë, 500 të vjetra në ditë.

Salianji: Dritat kur t’i kanë prerë​

E moshuara: Prej dy vjetësh. Vetëm një llampë kam këtu (në kuzhinë) dhe në korridor.

 Ajo thotë se askush nuk interesohet për jetën e saj, shteti e ka braktisur.

 “S’ka ardh kërkush. Vetëm jam këtu. Nga bashkia nuk duket kurrkush. S’kam parë kërkënd dhe asnjeri nuk më ndihmon. Nuk vjen asnjeri të më shohë”, thotë e moshuara.

Salianji: “Këtu tek ty mund të vijnë vetëm për fushatë për reklamë me kamera. Ja kështu si ti për tek plehrat i thotë qytetarëve shqiptarë se do të punësojë 30 mijë veta, ja kështu si ty do të punësojë njerëz, me 500 lekë të vjetra në ditë apo një mijë lekë e ta mbushë Shqipërinë plot me plehra. Ndërkohë Rama fiton 150 milion euro nga kjo. Ky godet të varfërit, godet njerëzit e pamundur si ti dhe bën lek për të pasurit dhe njerëzit e tij. Po ilaçet, shëndetësinë a ta kanë dhënë falas”?

E moshura: Jo, jo nuk më japin asgjë falas, i kam blerë dhe shtrenjtë. Mezi më del se duhet dhe të ha. 

Redaksia Online
(F.T/shqiptarja.com)