Juventus kërkon Hysajn, por Napoli
i mbyll derën: Është i paprekshëm

Mbrojtësi i djathtë i kombëtares shqiptare, Elseid Hysaj është në radarin e mjaft klubeve të mëdha Europiane. 

Mediat italiane bëjnë të ditur se pas interesimit të Bayern Munchen dhe Chelsea, edhe Juventus është në gjurmët e Hysajt. 

Largimi i Bonuçit ka trazuar jo pak ujërat në ambientin e skuadrës bardhezi. Tifozëria ka nisur ofendimet dhe shfryrjet ndaj ish-qendërmbrojtësit, mirëpo në skuadër duket qartë që ka nevojë për plotësime të nevojshme në ekip, për të ruajtur qetësinë dhe entuziazmin e tifozërisë.

Sajti informativ i lajmeve “iamnaples.it” ka bërë me dije se, gjatë dy ditëve të fundit, ka pasur një linjë bisedimesh mes Juventusit dhe Napolit. Sipas informacioneve të përcjella, bëhet me dije se drejtorët e Juventusit dhe Napolit kanë pasur një bisedë mes tyre. Paratiçi dhe Xhiuntoli kanë diskutuar rreth mbrojtësit të Kombëtares shqiptare të futbollit.

Bardhezinjtë kanë qenë të gatshëm për të nisur një bisedë rreth transferimit të mundshëm të Hysajt në Torino, mirëpo entuziazmin e ka ulur menjëherë përfaqësuesi i napolitanëve.

“Hysaj nuk preket!”, ka qenë një ultimatum i drejtuesve të Napolit që duket se gjen fillesa te vetë presidenti i skuadrës, i cili ishte i gatshëm të vendoste një klauzolë prej 50 milionë eurosh në kontratën e Hysajt, duke treguar qartë se është një futbollist tek i cili pritshmëritë janë shumë të larta.

Redaksia Online
l.q/Shqiptarja.com