ITALI- Kaos në aeroportin e Brindisit në Itali. 400 pasagjerë u revoltuan, pasi dy fluturime të Wizz Air që ishin nisur për në Tiranë, devijuan për shkak të motit të keq. Dy avionët, njëri i nisur nga Bolonja dhe tjetri nga Bergamo për në Tiranë, kanë bërë një ulje emergjente në aeroportin e Salentos, ku kanë mbërritur gjatë natës rreth orës 3.

Pëfundimisht, pasagjerët kanë pranuar dhe pritet të arrijnë në Shqipëri me një traget që niset nga Brindizi këtë pasdite dhe që shkon në Vlorë.

Sipas informacioneve të para, avionët kanë qëndruar për një kohë të gjatë në hapësirën ajrore shqiptare, në pritje për të kuptuar nëse mund të kryhej ulja në Rinas, por më pas kanë devijuar drejt aeroportit të Brindisit, me karburantin drejt përfundimit.

Situata në Brindisi është tensionuar në orët e para të mëngjesit, kur pasagjerët e devijuar, të cilët sipas informacioneve të aeroportit janë asistuar menjëherë, kanë thyer portat (gate) dhe janë futur në pistë, duke kërkuar përgjigje të menjëhershme nga kompania ajrore. Në vendngjarje kanë ndërhyrë forcat e policisë, por sipas informacioneve, të paktën 100 protestues ndodhen ende në pistë, pranë dy avionëve dhe kërkojnë që të nisen fluturimet drejt Tiranës. 

Aeroporti po monitorohet nga policia, karabinierët dhe oficerët e Guardia di Finanza për të parandaluar probleme të mëtejshme të rendit publik. Deri më tani, protesta nuk ka shkaktuar vonesa në fluturimet që mbërrijnë ose nisen nga Brindizi.

1767784892_ëizii.jpg

Pasagjerët në aeroportin e Brindisit 

Lajmi në përditësim...

Rendit zhvillimet sipas orarit:
Ora 12:55
Po vinte në Tiranë! Pasagjerja flet pas bllokimit në aeroportin e Brindisit: Mbetëm në ajër, ishim të frikësuar!

Një nga pasagjeret e fluturimit të Wizz Air nga Bergamo drejt Tiranës ka rrëfyer momentet e vështira të përjetuara në bord, pasi avioni u detyrua të devijojë dhe të ulet në Brindisi.

"Ndodhi diçka që ska ndodhur më parë. Në avion ishim 200-300 persona, të nisur nga Bergamo për Tiranë. U nisëm me vonesë dhe mbetëm në ajër për gjysëm ore dhe më pas piloti tha që për shkak të kushteve atmosferike nuk mund të uleshim dhe duhet të kthehemi mbrapsht. Ne nuk e dinim ku po shkonim. Kishte fëmijë, të moshuar, të sëmurë ! Të gjithë ishim të frikësuar! Vetëm kur pamë që kishim mbërritur në Brindisi, një vend që është tepër larg. Tani duhet të gjejmë zgjidhje për të shkuar në Romë, për të gjetur fluturimin e rradhës drejt Tiranës" tha ajo

Pasagjerja shtoi se mes udhëtarëve kishte shumë tension.

“Ishte normale që njerëzit të ishin të shqetësuar. Një zonjë me probleme me zemrën humbi ndjenjat dhe iu dha ndihma e shpejtë. Kishte edhe fëmijë që janë në udhëtim që nga dje në mëngjes,” tha ajo.

U.D/Shqiptarja.com