Kapen 9.5 tonë kokainë në banane në Republikën Domenikane, ngarkesa më e madhe në historinë e vendit! Destinacion Belgjika

Autoritetet në Republikën Dominikane kanë konfiskuar pothuajse 9.5 tonë kokainë, të gjetura në një ngarkesë me banane. Ky është sekuestrimi më i madh i drogës në historinë e vendit.

Droga, me vlerë prej 250 milionë dollarësh (196 milionë paund), u gjet në një ngarkesë që kishte mbërritur në portin kryesor të vendit, Caucedo, në kryeqytetin Santo Domingo.

Ngarkesa ishte dërguar nga Guatemala dhe kishte si destinacion Belgjikën, sipas Carlos Devers, zëdhënës i agjencisë kundër drogës në Republikën Dominikane.

Ai tha gjatë një konference për shtyp se dhjetë persona ishin ndaluar.

“Hetimet e para tregojnë se një kontejner që transportonte banane mbërriti nga Guatemala,” tha ai. “Shumë individë të panjohur tentuan të transferonin drogën në një kontejner tjetër që do të dërgohej me anije drejt Belgjikës.”

Ai theksoi se ky ishte sekuestrimi më i madh në vend, duke tejkaluar një tjetër sekuestrim prej 2.6 tonësh, gjithashtu në Caucedo, në vitin 2006.

Autoritetet në Republikën Dominikane kanë sekuestruar gati 47 tonë drogë deri më tani këtë vit.

InSight Crime, një institut që analizon krimin e organizuar, ka thënë se sekuestrimet rekord të bëra këtë vit sugjerojnë që Karaibet po rikthehen si një rrugë kryesore trafikimi nga Kolumbia drejt Evropës, ku konsumi mendohet se është dyfishuar midis viteve 2011 dhe vitit të kaluar.

“Ndërsa kërkesa rritet, trafikantët po shtojnë përpjekjet për ta plotësuar atë, duke e konsideruar Karaibet si një kanal ideal për kontrabandën e kokainës drejt Evropës,” tha InSight Crime në një analizë të bërë në fund të nëntorit, duke vënë në dukje se qendrat e mëdha transportuese të Republikës Dominikane ofrojnë mundësi të shumta për trafikantët./ The Guardian

K.M/A.Q/Shqiptarja.com

TAG:
• kokaine
• republika domenikane